УИХ-ын чуулганы нэгдсэн хуралдаан эхэллээ. Улсын Их Хурлын гишүүн Б.Пүрэвдорж өндөр насны тэтгэвэр тогтоолтын талаар байр сууриа дахин илэрхийлэв.
Тэрбээр “УИХ-ын гишүүд хөдөөгөөр явж иргэдтэй уулзалт хийсэн. Уулзалтаар их сэргэлтийн бодлого ч билүү, тэрийгээ хийчихвэл эдийн засаг сайхан болчихно гэж МАН-ын гишүүд ярьсан байна лээ. Та нарын уулзалтад дандаа МАН-ын гишүүд ирсэн учраас бүх иргэдийн үг сайн хүрээгүй гэж бодож байна.
Манай Дуут сумын иргэн “Манайд 4,050 төгрөгөөр дизель түлш зарж байхад зарим гишүүн 700 төгрөгөөр борлуулж байна гэж “донгосоод” зогсож байх юм, ямар амьдралаас тасархай байдаг юм бэ” гэсэн.
Зарим гишүүд хөдөөгөөр явахдаа бидний өргөн барьсан тэтгэврийг долоо биш таван жилийн цалингийн дунджаас тогтоодог болох хуулийн төслийг буруугаар мушгисан байна лээ. Үнийн өсөлт, хүмүүсийг ядууруулж байгаагаа ярихгүй байж УИХ-ын гишүүний өргөн барьсан хуулийг буруугаар ойлгуулаад явсан хэд хэдэн гишүүн байна. Тэдний хэлсэн үгнүүд нь группт /фейсбүүк/ тавигдсан байна лээ.
Ахмадууд шударгаар тэтгэврийн шимтгэлээ төлчхөөд буцаагаад авах болохоор бага тэтгэвэр авдаг. Энэ хуулиа л өөрчлөөд өгөөч.
Хэрэв тэтгэврийг таван жилээр тогтоовол жилдээ таван тэрбум төгрөгний л зардал гарна. МАН-ын гишүүдийн бага төлж байгаад гэнэт их төлчихнө гэж айгаад байгаа асуудлыг журмалж болно шүү дээ.
