ТТАХНЭ-ийн сэтгэцийн их эмч Э.Даваажаргал Короновируст халдварын үед сэтгэл зүйгээ хэрхэн хамгаалах талаар зөвлөгөө өглөө.
Хүмүүс нийгмийг хамарсан халдварт өвчний үед маш их хямардаг. Учир нь аливаа нэгэн гамшиг цар тахал нь маш хоруу чанар ихтэй, хүчтэй стрессийг хүнд үүсгэдэг.
Энэ үед хүмүүс айдас, сэтгэл түгшилт, гомдол, сэтгэл гутрал гэх мэт сөрөг сэтгэл хөдлөлөөр хариу урвал үзүүлдэг. Эдгээр сөрөг сэтгэл хөдлөл нь бие махбодыг хүчдэлийн байдалд оруулж хоол боловсруулах эрхтэн, зүрх судасны үйл ажиллагааг муутгаж дархлааг сулруулдаг.
Сөрөг сэтгэл хөдлөлөө удирдаж, тайвшрах хамгийн энгийн үр дүнтэй арга нь зөв амьсгалах юм. Түүнчлэн зөв хооллож, бусадтай сайхан харилцаж, дандаа эерэг байх хэрэгтэй. Учир нь эдгээр нь өөрийнхөө сэтгэл зүйг хамгаалах нэг алхам болдог.
Сөрөг сэтгэл хөдлөлөө удирдах хамгийн эхний арга зам буюу зөв амьсгалын талаар мэдээлэл өгье.
- Хүмүүс өөрийгөө зөв болон буруу амьсгалж байгаагаа мэддэггүй. Тиймээс эхлээд амьсгалаа ажиглах хэрэгтэй.
- Дараа нь хэвлий дээрээ гараа тавиад, гэдсээ дүүртэл амьсгал аваад гаргахдаа гараараа дарж өгнө.
- Энэ амьсгалыг 5-10 минут давтах хэрэгтэй. Ингэснээр бие амарч, тайвшрах болно.
Аливаа нэг бэрхшээл тулгарахад түүнийгээ хөгжих боломж гэж хараад, сэтгэлийн тэнхээтэй байгаарай гэж хүсье.
Эх сурвалж: ТТАНЭ