Монгол Улсын ерөнхийлөгч иргэдэд шинэ жилийн баярын мэндчилгээ дэвшүүлэх үеэр зарим иргэн өөрийн хийсэн бичлэг, зургаа цахим орчинд түгээсэн асуудлаар цагдаагийн байгууллагаас мэдээлэв.
ЦЕГ-ын Гэмт хэрэг, зөрчлөөс урьдчилан сэргийлэх хэлтсийн дарга, цагдаагийн дэд хурандаа О.Одонбаатар “Гэмт хэрэг зөрчлөөс урьдчилан сэргийлэх тухай хуулийн 31 дүгээр зүйлд зааснаар иргэн бусдын нэр төр, алдар хүнд, хууль ёсны ашиг сонирхлыг хохироохгүй байх, өөрийн үзэл бодлоо илэрхийлэхдээ бусдын нэр төр, алдар хүндэд хүндэтгэлтэй хандах, гэмт хэрэг, зөрчилд бусдыг өдөөн хатгахгүй, олон нийтийн аюулгүй байдал нийгмийн хэв журмыг гажуудуулах үйлдлийг гаргахгүй байх үүрэгтэй байдаг. Энэхүү үүргийг зөрсөн тохиолдолд Зөрчлийн тухай хуульд зааснаар иргэнийг 100 нэгжтэй тэнцэх 100,000 төгрөгөөр торгох зохицуулалттай.
Цагдаагийн байгууллагаас цахим орчинд гарсан мэдээллийг шалгаж, дээрх хуулийн дагуу шийдвэрлэсэн. Үндсэн хуульд Ерөнхийлөгч төрийн тэргүүн, Монголын ард түмний эв нэгдлийн илэрхийлэл мөн, Ерөнхийлөгчийн нэр төр, халдашгүй байдлыг хуулиар хамгаална гэж заасан байдаг.
Ерөнхийлөгчийн бие, нэр төр, ордон өргөө халдашгүй дархан эрхтэйг Ерөнхийлөгчийн тухай хуульд заасан. Ерөнхийлөгчийн мэндчилгээтэй холбогдуулан гурван хүнд хариуцлага тооцсон. Зарим иргэнд зөвлөж, олон нийтийн сүлжээнд тавьсан контентуудыг устгуулах талаар зөвлөсөн” хэмээн хэлэв.