Долоо хоног бүрийн Даваа гарагт УИХ-д суудалтай намын бүлгүүд хуралддаг. Өнөөдөр өглөөний 10.00 цагт эхэлсэн МАН-ын бүлгийн хуралдаанаар Үндсэн хуульд оруулах өөрчлөлтийн төсөл болон цалин, тэтгэврийг нэмэх, хүүхдийн мөнгийг хүүхэд бүрт 100 хувь олгох зэрэг асуудлуудыг хэлэлцэж буй билээ.
Тэгвэл бүлэг ирэх долоодугаар сарын 1-нээс эхлэн цалин, тэтгэврийг нэмэхийг дэмжжээ. Учир нь Сангийн яам түүхэндээ анх удаа төсвийн орлогын төлөвлөгөөг давуулан биелүүлсэн байна. Ингэснээр цалин, тэтгэврийг нэмэх нөөц боломж бүрдсэн аж.
Тиймээс бүлгээс цалин, тэтгэврийг ирэх долоодугаар сарын 1-нээс нэмэхийг 100 хувь дэмжжээ.
Энэ талаар Сангийн сайд Б.Жавхлан” Маргаашийн Засгийн газрын хуралдаанаар төсөвт тодотгол хийх асуудлыг шийдэж, УИХ-д өргөн барихаар боллоо. Мөн хүүхдийн мөнгийг хүүхэд бүрт олгохоор болж, энэ оны нэгдүгээр сараас хойших мөнгийг нөхөж олгохоор болж байна. Төсөвт тодотгол хийхэд нэмж 1.8 их наяд төгрөг шаардлагатай болж байна. Эх үүсвэрийг уул уурхайн бүтээгдэхүүний экспортын орлогоос бүрдүүлэх тооцоо судалгааг хийгээд байна. Эхний улирлын байдлаар бид 19.9 сая тонн нүүрс экспортолсон буюу нийт жилийн төлөвлөгөөний 30 гаруй хувь биелээд байна. Төсвийн орлого 38 тэрбум төгрөгөөр нэмэгдсэн сайн дүнтэй байна” хэмээв.
