Улсын Их Хурлын гишүүн Ч.Ундрам, Ш.Адьшаа, П.Анужин, Т.Аубакир, Б.Саранчимэг нар хуульд заасан бүрэн эрхийнхээ хүрээнд санаачлан боловсруулсан Органик бүтээгдэхүүний тухай хуулийн шинэчилсэн найруулгын төслийг 2023.03.16-нд Улсын Их Хурлын дарга Г.Занданшатарт өргөн мэдүүлсэн.
Энэ талаар УИХ-ын гишүүн, БОХХАА-н байнгын хорооны дарга Б.Саранчимэг мэдээлэл өгөхдөө “Органик бүтээгдэхүүний тухай хуулийг боловсруулж байгаа. Дэлхий нийт генетикийн өөрчлөлтгүй, органик бүтээгдэхүүн үйлдвэрлэж байна. Монгол Улс эрүүл хөрс, малтай. Тиймээс энэ хуулийг батлуулснаар органик бүтээгдэхүүн үйлдвэрлэж, экспортлох боломж бүрдэх юм. Цаашлаад ямар хүнсийг эрүүл, органик гэх вэ гэдгийг магадлан итгэмжилнэ. Хүнсний гарал үүслийг баталгаатай болгож, органик бүтээгдэхүүнийг маркжуулж өгнө.
Дэлхий дахинд органик бүтээгдэхүүнийг гаргахдаа энэ байгальд ээлтэй юу, үгүй юу гэдгийг судалдаг болчихсон байна. Бид хуулийг боловсруулах НҮБ-ын холбогдох хүмүүстэй хамтран ажилласан” гэсэн юм.
Түүнчлэн, Хуулийн төсөлд органик хүнсний бүртгэл мэдээллийг цахим сангийн үйл ажиллагааг нэгдсэн удирдлага, зохион байгуулалтаар хангах, төрийн байгууллагуудын чиг үүргийг тодорхойлон тусгах, импортыг орлох үндэсний органик бүтээгдэхүүнийг баталгаажуулах тогтолцоог бүрдүүлэх, үйлдвэрүүдийн түүхий эдийн нөөцийг нэмэгдүүлэх, органик үйлдвэрлэл эрхлэгчдэд үзүүлэх дэмжлэг, урамшуулал, органик үйлдвэрлэл, бүтээгдэхүүнд тавих хяналт, хариуцлагын тогтолцооны асуудлыг нарийвчлан тусгасан байна.
