ХӨСҮТ-өөс заг хүйтэн өвчний талаар зөвлөгөө, мэдээлэл өглөө.
Заг хүйтэн өвчин нь Нейссерийн гонококк (Neisseria gonorrhoeae)-оор үүсгэгдэж, шээс бэлэг эрхтний салст бүрхэвчийг гэмтээдэг бэлгийн замаар дамжих халдвар юм.
Заг хүйтэн өвчин яаж халдварладаг вэ?
- Заг хүйтэн өвчтэй хүнтэй хамгаалалтгүй бэлгийн харьцаанд орох (амаар, үтрээгээр, шулуун гэдсээр)
- Заг хүйтэн өвчний халдвартай жирэмсэн эмэгтэйгээс ураг төрөх үед халдвар авна (нярайн нүдний салстын үрэвсэл)
Заг хүйтэн өвчний үед ямар шинж тэмдэг илрэх вэ?
Нууц хугацаа дунджаар 2-5 хоног үргэлжилнэ. Заг хүйтэн өвчний үүсгэгч гонококк нь ихэвчлэн эрэгтэйчүүдэд шээсний суваг, эмэгтэйчүүдэд умайн хүзүү, шээсний суваг, бага насны охидод бэлгийн уруул, үтрээний салстыг үрэвсүүлнэ.
Эрэгтэйд илрэх шинж тэмдэг: Голчлон шээсний сувгийн үрэвслээр илэрнэ.
- Шээсний сүв орчим бага зэрэг загатнаж, ирвэгнэнэ
- Шээхэд хорсоно, өвдөнө
- Шээсний сувгаас өтгөн ногоон идээт ялгадас гарна
- Шээсний сувгийн амсар улайж, хавагнана
- Бэлгийн харьцааны үед өвдөнө
- Шээс ойр ойрхон хүрнэ
Эмэгтэйд умайн хүзүүний үрэвслээр илрэх ба зовиур багатай, балархай хэлбэрээр (75%) элбэг тохиолдоно.
- Бэлэг эрхтэн орчим эвгүй оргиж, загатнана
- Умайн хүзүүний сувгаас өтгөн ногоон, идээт ялгадас гарна
- Умайн хүзүүний салст улайж хавагнана
- Хэвлийн доод хэсгээр өвдөх зовиур илэрч болно
Заг хүйтэн өвчний хүндрэл үүсэхэд ямар шалтгаанууд нөлөөлөх вэ?
- Эмчилгээг үр дүнгүй хийх
- Эмчилгээ таслах
- Өөрөө буруу, дутуу эмчлэх
- Эмчилгээний үед дэглэм алдагдах (Архи, спиртийн төрлийн ундаа хэрэглэх, бэлгийн хавьталд орох)
- Бэлгийн замаар дамжих бусад халдвартай хавсрах
Заг хүйтэн өвчний үед ямар хүндрэлүүд үүсэх вэ?
Эрэгтэйд:
- Түрүү булчирхай, төмсөгний дайвар, үрийн цулцангийн үрэвсэл
- Үргүйдэл
Эмэгтэйд
- Аарцгийн хөндийн эрхтний үрэвсэл
- Хэвлийн доод хэсгийн архаг өвдөлт
- Умайн гадуурх жирэмслэлт
- Үргүйдэл
Заг хүйтэн өвчин эмчлэгддэг үү?
Мэргэжлийн эмчид хандаж бэлгийн хамтрагчийн хамт оношлогоо, эмчилгээ хийлгэвэл бүрэн эдгэрдэг.