ЭНЭҮТ-II нь дүрс оношилгоо, MRI, хөхний маммографийн шинжилгээнүүдийг харьяалал харгалзахгүй хийж байгаа талаар “Эх нярай, эмэгтэйчүүдийн үндэсний төв II”-ийн Дүрс оношилгооны тасгийн эрхлэгч Э.Соел-Эрдэнэ мэдээлэл өглөө.
ЭНЭҮТ-ийн дүрс оношилгооны тасаг нь дүрс оношилгооны бүхий л тоног төхөөрөмжөөр тоноглогдсон. Тухайлбал, цээжний рентген зураг авах суурин аппарат, зөөх боломжгүй өвчтөнүүдийн зургийг авах зөөврийн аппараттай. Мөн тодосгогчтой болон үйл ажиллагаануудын шинжилгээг хийх, рентген харалтын шинжилгээ гэсэн үндсэн шинжилгээг хийж байна.
Манай эмнэлэг дөрвөн эхо аппаратаар үйлчилж байгаа. Тодруулбал хүүхэд, нярай, том хүний хэвлий, зулай, зөөлөн эд, түнх, үе мөч, хөх, бамбайн эхо шинжилгээг хийж байна.
Мөн хөхний момографийн шинжилгээг сүүлийн үеийн өндөр хүчин чадалтай, богино хугацаанд өвдөлт багатайгаар зураг авч чаддаг, нягтрал сайтай аппаратаар хийж байна. Манай компьютер томограф нь 80-120 зүслэгээр шинжилгээ хийдэг бөгөөд өндөр жинтэй хүмүүсийн шинжилгээг хийдгээрээ онцлог. Түүнчлэн MRI аппарат маань монголд цөөхөн байдаг бөгөөд бүх төрлийн эрхтнүүдэд зориулагдсан тусгай төхөөрөмжөөр тоноглогдсон байдаг.
ЭНЭҮТ II нь ЭХЭМҮТ болон дүүргийн эмнэлгийн ачааллыг хуваалцаж, харьяалал харгалзахгүйгээр дүрс оношилгоо, эхо, рентген, компьютер томограф, MRI шинжилгээнүүдийг хийж байна. Мөн иргэд эдгээр өндөр өртөгтэй шинжилгээг ЭМД-аараа хийлгэх бүрэн боломжтой” гэлээ.
