Украины Ерөнхийлөгч Володимир Зеленьский өчигдөр Хонконгийн англи хэл дээр нийтлэгддэг South China Morning Post сонины сэтгүүлчдэд Zoom апплкэйшнээр дамжуулан ярилцлага өгчээ. Тэрээр ярилцлагадаа Хятадын төрийн тэргүүн Си Зиньпинтэй шууд уулзалт хийж, гал зогсоох, энх тайваныг тогтоохын тулд ОХУ-д нөлөөлөхийг хүсэх бодолтой байгаагаа ярьсан байна.
Володимир Зеленьский “Би Си Зиньпин Ерөнхийлөгчтэй шууд нүүр тулсан уулзалт товлох бодолтой байна. Түүнтэй жилийн өмнө ганц л удаа ярилцаж байсан. Хоёрдугаар сарын 24-ний өдөр дайн эхэлснээс хойш бид ярилцах боломжийг албаны шугамаар хүссэн ч одоо болтол хэрэгжиж чадаагүй байгаа. Хятад бол маш их хүчирхэг улс. Маш хүчирхэг эдийн засагтай. Мөн НҮБ-ын Аюулгүй байдлын зөвлөлийн байнгын гол гишүүн орон. Тиймээс ОХУ-д улс төрийн болон эдийн засгийн нөлөө үзүүлэх чадалтай гол орон юм. Тэнцвэртэй гадаад бодлого баримтлах Бээжингийн сонирхлыг ойлгож байгаа ч ОХУ ямар ч бодит шалтгаангүйгээр тусгаар тогтносон Украины газар нутагт халдан довтолсныг хүлээн зөвшөөрнө гэж найдаж байгаа. Хятадын зах зээлгүйгээр ОХУ жинхэнээсээ эдийн засгийн хувьд тусгаарлагдана гэдэгт би итгэлтэй байна. Дайн дуусах хүртэл ОХУ-тай хийх худалдаагаа хязгаарлах нь Хятад улсын үзүүлэх, энх тайван тогтооход нөлөөлөх том хүчин зүйл юм” хэмээн ярьжээ.
Украин, БНХАУ өнгөрсөн онд дайн эхлэхийн өмнөхөн дипломат харилцаа тогтоосныхоо 30 жилийн ойг тэмдэглэсэн юм. 2021 оны байдлаар Хятад улс нь Украины хамгийн том худалдааны түнш байжээ. Хоёр улсын худалдааны эргэлт тухайн жилд бараг $19 тэрбумд хүрч байжээ. Өнгөрсөн онд утсаар ярихдаа Украинд нэг удаа зочилж байсан, энэ улсын талаар сайхан дурсамжтай явдгаа Си Зиньпин онцолж байсан хэмээн Зеленьский яриандаа дурсжээ.
