АШУҮИС-ийн Монгол-Японы эмнэлгийн Нүд судлалын тасгийн нүдний эмч А.Тамир “Хүүхдийн харааг хэзээ шалгуулах хэрэгтэй вэ?” сэдвийн хүрээнд зөвлөгөө өгснийг сийрүүлэн хүргэж байна.
Хэзээ хүүхдийнхээ нүдийг үзүүлэх ёстой вэ?
Хүүхдээ төрсөн цагаас хойш эхний зургаан сарын дотор анхны үзлэгийг хийлгэсэн байх шаардлагатай. Үүнээс цаашаа 3-4 насанд буюу хүүхэд дүрс таньдаг болсон үед хүүхдийн харааг шалгуулах ёстой. Энэ бол маш чухал цаг хугацаа. Үүнээс хойш 4-5, 5-6 насанд жилдээ нэг удаа нүдний эмчид үзүүлнэ.
Хэрэв шаардлагатай бол зургаан наснаас хойш эмч тухайн хүүхдэд товлолт үзлэгийг хэлж өгнө. Тиймээс эхний үзлэг хамгийн чухал.
Хүүхдийн хараа муу байснаар сурч боловсрох боломж хаагддаг. Сурлагын үнэлгээ, сургууль завсардахад нөлөөлдөг гэж ОУ-д үздэг. Тиймээс хүүхдийн нүдийг товлолт хугацаанд нь үзүүлээрэй.
Хүүхдийн нүдийг цаг хугацаанд үзүүлэхгүй бол ямар эрсдэлтэй вэ?
Хүүхдийн нүдийг цаг хугацаанд үзүүлээгүйгээс болж дэлхий дахинд тохиолдож байгаа хэд хэдэн асуудал байна. Тухайлбал мохос хараа, хялар хараа, хугарлын гажиг үүсэх нь элбэг байдаг.
Эх сурвалж: АШУҮИС-ийн Монгол-Японы эмнэлэг