БНСУ-д сүүлийн 80 жилд ороогүй хүчтэй аадар бороо орсны улмаас багадаа 11 хүн нас барж, 8 хүн сураггүй алга болсон талаар мэдээлсэн билээ. Эдгээр хүмүүсийн дийлэнх нь хагас подвал буюу “банжиха”-д амьдардаг иргэд байсан аж. Ядуу амьдралтай гэр бүлүүдийн амьдардаг ийм төрлийн сууцыг Оскарын шагналт “Parasite” кинонд тодорхой үзүүлсэн байдаг.
Анх 1960-аад оны үед агаарын довтолгооноос хамгалаах байр болгон ашиглах зорилгоор подвал барьж байсан бөгөөд 1970-аад оноос эхлэн бага орлоготой иргэд орон сууцны зориулалтаар ашиглаж эхэлсэн байна. Уг сууц үерт автах эрсдэл өндөртэйд тооцогддог. 2020 оны байдлаар Сөүл хотын айл өрхүүдийн 5 орчим хувь буюу 200,000 ийм төрлийн сууцанд амьдардаг гэсэн тооцоолол бий.
Даваа гарагийн шөнө эгч дүүс үерт автсан байрандаа эндсэн тохиолдол гарсан бөгөөд тусламж хүссэн ч аврагчид тэдэнд хүрч чадаагүй байна.
Тиймээс тус улс иргэдээ байшингийн доод хонгилд амьдрахыг хориглосон шийдвэр гаргалаа. Иргэдээ нийтийн орон сууцанд нүүлгэн шилжүүлж, тодорхой хэмжээний санхүүгийн дэмжлэг үзүүлэх аж.