“Цемент шохой” ТӨХК-иас цементийн үнийн өсөлтийн эсрэг аяныг эхлүүлж 1 уут цементийг 15000 төгрөгөөр худалдаалж эхэллээ. Энэ талаар Хөтөлийн цементийн үйлдвэрийн захирал Л.Наранбаатар сэтгүүлчдэд мэдээлэл өглөө.
-Цементийн үнэ маш өндөр байна. Энэ юутай холбоотой вэ?
-Захуудаар үнэ судалсан. МАК, Монцементийн ууттай цементийг 24,000- 25,000₮ ( тонн нь 480,000-500,000₮) зарж буй нь сезоны улиралд айл өрхүүдэд маш их дарамт болж байна.
Яг одоо сезоны үе эхэлчихсэн. Мөн тээвэрлэлтийн хувьд асуудалтай байгаа. Хил гаалийн гацалттай холбоотой. Мөн шуудай ч тасраад байна. Гэхдээ манайх шуудайгаа он дуустал хүрэлцэхүйц хэмжээгээр татаж авсан. Хөтөлийн цементийг том барилгын компаниуд хэрэглэдэггүй. Ихэвчлэн айл өрхүүд хэрэглэдэг.
-1 уут цемент 15000 төгрөгөөр худалдаалах аяныхаа талаар мэдээлэл өгвөл?
-Өнөөдрөөс Хөтөлийн “Цемент Шохой” ТӨХК өөрийн гэрээт борлуулагчдаар дамжуулан захуудаар тодорхой хяналттайгаар, ченжийн гар дамжуулахгүйгээр борлуулалт хийж эхэллээ. Үнийг бид 15,000₮ -өөр тогтоож, байшин барьж буй нэг хүнд 7 хоногт нэг удаа 5 тонн цемент өгөх байдлаар зохицуулалт хийж байна.
Өдөрт бид багадаа 50кг-аар савласан 20 мянган ширхэг ууттай цемент УБ -ын 44, Толгойт, Амгалан дахь захуудад борлуулж, айл өрхүүдийг үнийн өсөлтийн дарамтаас гаргана.
Цаашлаад энэ долоо хоногтоо Дархан, Эрдэнэт, Сэлэнгэ аймгийн төвийн барилгын материалын захуудад нийлүүлэлт хийж ууттай цементийг тухайн бүс нутагт үнийн цохилт өгнө.
Энэ аяныг өрнүүлэхэд Төрийн өмчийн бодлого зохицуулалтын газраас биднийг их дэмжиж байгаа. УБТЗ-тай ярилцаад хэрхэн туслах уу гэдгийг асуусан. Бид нар үйлдвэрлэлээ тогтвортой барина. Манай ТУЗ-ийн гишүүд маш шуурхай ажилладаг.
-Хөтөлийн цементийн чанар ямар вэ?
-Хөтөлийн цемент шохой үйлдвэр өөрөө дотроо лабораторитай. Чанарын хувьд одоогоор ямар нэг доголдолгүй. Өдөр бүр шалгалт хийгддэг.
-Цементийн үнэ буурах уу?
-Зах зээлээ дагаад буурахаас өөр аргагүй. Ченжүүдэд хандаж хэлэхэд та бүхэн цементээ хадгалаад нэмэргүй шүү. Үнийг нь буулгаад захуудаар зарахгүй бол ашиггүй. Дархан Эрдэнэт, Сэлэнгэ чиглэлд цемент 14.000 төгрөг. Нийслэлд 15.000-аас хэтрэхгүй байхаар зохицуулж байна.
-Танай байгууллагын 3 тээрэм ажилласнаар хэд орчим тонн цемент үйлдвэрлэх вэ?
-Сезоны улиралд хоногт 15-20 мянган тонн цемент хэрэглэдэг. Бид 1000-1500 тонн цемент Улаанбаатар руу оруулж ирэхэд 40-50 хувийг хангана.
-Нөөц ямар байгаа вэ?
-Бид одоогийн байдлаар 6000 тонн цемент агуулахад хадгалсан байна. Манай агуулахын хэмжээ өдөрт 1000 тонноор нэмэгдэж байгаа. Цементийн үйлдвэрийн ажилчид их туршлагатай байгаа учир нөөцийн хувьд асуудалгүй.
Өчигдөр 3695 тонн үйлдвэрлэсэн. Бидэнд одоо ганц тулгамдаж буй асуудал бол ложистик буюу тээвэрлэлт. Энэ нь биднээс хамаарахгүй зүйл байгаа юм.
