УИХ-ын Чуулганы нэгдсэн хуралдаанаар Эрүүл мэндийн сайд С.Энхболд Улсын Их Хурлын гишүүн Ж.Чинбүрэнгээс Монгол Улсын Ерөнхий сайдад хандаж “Элэг бүтэн Монгол” Үндэсний хөтөлбөрийн хэрэгжилтийн талаар тавьсан асуулгын хариултыг танилцууллаа.
Энэ үеэр гишүүд асуулт асууж, хариулт авав.
УИХ-ын гишүүн Б.Баярсайхан: Монгол Улсад насанд хүрсэн хоёр хүн тутмын нэг нь, гурван хүүхэд тутмын нэг нь таргалалттай байна. ЭМЯ-наас өгч байгаа мэдээллээр хавдар үүсч байгаа гол гурван шалтгааны нэг нь буруу хооллолт, хөдөлгөөний хомсдол. Завхан аймагт 600 гаруй хүн хорт хавдрын улмаас үхэл, амьдралтай тэмцэж байна.
Эрүүл мэндийн сайдын өнгөрөгч хоёр онд хийсэн ажлуудын хэрэгжилтийг 100 хувь гэж дүгнэсэн байна. Салбарын сайдын орон нутагт хийх ажил Завхан аймагт ямар түвшинд байна вэ, хэдэн төгрөг зарцуулсан бэ? Нийгмийн эрүүл мэндийг сайжруулахад яг юу хийгдсэн бэ? Нэг аймгийн ард иргэд соён гэгээрч чадаагүй, буруу хооллолтын талаар мэдэхгүй байхад яагаад өөрсдийн ажлыг 100 хувь гэж үнэлдэг юм.
Орон нутагт, ялангуяа алслагдсан Завхан аймагт төрийн албан хаагчдын цалин бага. Дээрээс нь цаг наргүй ажилладаг, өвчлөлд өртөмтгий. Засгийн газраас хэрэгжүүлж байгаа зорилтыг төрийн албан хаагчдад мэдрүүлж, яаж эрүүл амьдрах, хөдөлгөөн, хооллолтоо зохицуулах мэдээллийг өгчихвөл орон нутагтаа нөлөөлөх хүмүүс нь тэд байдаг. С.Энхболд сайд та ажлаа сайн хийгээгүй учраас миний бие Завхан аймагт нийгмийн эрүүл мэндийг сайжруулах тал дээр хүсэлт гаргасан нь үнэн.