УИХ дахь эмэгтэй гишүүдийн бүлэг Гэр бүлийн тухай хуульд нэмэлт өөрчлөлт оруулах тухай хуулийн төслийг УИХ-ын даргад өргөн барилаа. Үүнтэй холбогдуулан хуулийн төслийн талаар мэдээлэл хийлээ.
УИХ-ын гишүүн Ч.Ундрам: Бидний эргэн тойронд гэр бүл салалтын улмаас хүүхдүүд хохирч байгаа маш олон тохиолдлууд бий. Тийм ч учраас УИХ-ын 13 эмэгтэй гишүүд нийлээд Гэр бүлийн тухай хуульд өөрчлөлт оруулах тухай хуулийн төслийг өргөн барьж байна. Уг хууль анх 1973 онд батлагдаж, 1999 онд шинэчилсэн найруулга нь мөрдөгдөж эхэлсэн.
Хуулийн гол өөрчлөлт нь хүүхэд хамгааллын тухай заалтууд. Гэр бүл салалтын улмаас хамгийн их хохирдог нь хүүхэд. Монгол Улсад жилд 3391 орчим гэр бүл салдаг гэсэн судалгаа бий. Сүүлийн жилүүдэд гэр бүл салалт жилд тутам нэг хувиар нэмэгдэж байгаагийн цаана дунджаар 7000 орчим хүүхдийн асуудал хөндөгдөнө.
Хүүхэдтэй холбоотой гол асуудал нь тэтгэмж, тэтгэмж төлөлтийн асуудал. Үүнийг энэ хуульд онцгойлон анхаарсан. Тухайлбал,
Одоогийн мөрдөгдөж байгаа хуульд 11 хүртэлх насны хүүхдийн тэтгэмжийг амьдралын баталгаажих түвшний 50 хувийг тооцож олгодог. 11-ээс дээш насныханд амьдралын баталгаажих түвшний доод хэмжээгээр тогтоодог бөгөөд энэ нь бүс нутгаар өөр өөр байна.
Үндэсний статистикийн хорооны дарга нь амьдралын баталгаажих түвшнийг тогтоодог бөгөөд дунджаар 230 орчим мянга байна. Ингэж бодвол 11-ээс доош насны хүүхдийн тэтгэмж сард 115 мянгаар тогтоогддог. Өнөөгийн нийгэмд энэ мөнгийг хүүхдийн боловсрол, эрүүл мэндийн зардалд зарцуулах боломж байхгүй, хүрэлцэхгүй. Тиймээс тэтгэмжийг орлоготой нь уялдуулах, ХАОАТ-ын тухай хуульд заасан орлогын 50-иас доошгүй хувиар тогтооё гэж энэ хуулийн төслийг өргөн барьж байна.
Мөн тэтгэмж төлөлтийн асуудал байна. Нийт тэтгэмж төлөх ёстой хүмүүсийн зөвхөн 20 хувь төлж байна. 80 хувь нь огт төлдөггүй, өнөөдрийн байдлаар 34 тэрбум төгрөг төлөгдөөгүй хуримтлагдсан. Тиймээс тогтоосон тэтгэмжийг данснаас нь шууд татдаг байхыг уг хуулийн төсөлд тусгасан.
