Зам, тээврийн хөгжлийн сайд Д.Халтар Засгийн газрын хуралдаанаар /20226.05.25/ гаргасан шийдвэрийг танилцуулах үеэрээ сэтгүүлчдийн асуултад хариуллаа.
-Ачаа тээврийн үнэ 25 сая байсан бол одоо хоёр дахин өсчихлөө. Үүний шалтгаан юу вэ?
-Хуучин задгай тээвэр чингэлэгт шилжиснээр үнэ өслөө гэдэг зүйл байсан. Тухайн үеийн үнийн өсөлтийг хил нээгдсэний дараа судалсан. Эрээнд байгаа консултай нэг бус удаа ярилцсан. Ингээд судлахад бүх ачаа, ялангуяа жижиг илгээлт, цахим худалдаа Улаанбаатарын нөхцөлтэйгөөр зарагддаг. Өөрөөр хэлбэл, хүлээн авагч нь Улаанбаатар хүртэлх мөнгөө төлчихдөг.
Тиймээс хүлээн авагчийн зүгээс хил хоорондын болон эцсийн цэг хүртэлх тооцооллыг нарийн гаргасан зүйл байхгүйгээр шууд хятадуудад, ялангуяа Эрээн дээр ажиллаж буй тээвэр зуучийн компаниудад мөнгөө төлдөг гэдгийг бид сүүлд мэдсэн.
Энэ тухай бид Эрээн дэх консул, Хөх хот дахь Ерөнхий консулын газар, Бээжин дэх Элчин сайдын яамны шугамаар Хятадын холбогдох газруудад мэдээлсэн. Мөн Эрээн дээр сугалаа нэг хэсэг явагдсан нь үнэ хөөрөгдөх гол шалтгаан болоод байгааг зогсоож, гаалийн хяналтын талбайд орж ирсэн дарааллаар ачилтыг хийх тухай хүсэлтийг тавьсан юм.
Магадгүй хүчний байгууллагууд Эрээнд ажиллаад, илрүүлээд байгаа явдал нь Монголын талаас тавьсан асуудлуудад ач холбогдол өгч, дотооддоо ярилцсан байхыг үгүйсгэггүй. Түүнийг таашгүй.
Хятадын талаас цар тахлын хүнд үеийг бодвол арай зөөлрөх хандлага гарч байна. Тиймээс хуучин задгай тээвэр тодорхой хугацааны дараа эхлэхийг үгүйсгэхгүй. Гэхдээ тодорхой хугацаа хэлж чадахгүй.