Ерөнхий сайдын ажлын албаны дэргэдэх Иргэд, олон нийттэй харилцах 11-11 төвд Эрүүл мэндийн сайд С.Энхболд ажиллаж, иргэдийг хүлээн авч уулзсан. Энэ үеэрээ Эрт илрүүлэх, урьдчилан сэргийлэх үзлэгийн талаар дараах мэдээллийг өгчээ.
Тэрбээр, “Тавдугаар сарын 1-нээс эхлэн бүх иргэдээ эрт илрүүлэх, урьдчилан сэргийлэх оношилгоо, шинжилгээнд хамруулах ажлыг эхэлсэн. Өнөөдрийн байдлаар улсын хэмжээнд нийтдээ 18 мянган хүн хамрагдаад байна. Долоо хоног тутамдаа үр дүнгийн мэдээллийг нэгтгэж байгаа. Дүгнэхэд арай эрт байна.
Урьдчилсан дүнгээр ходоодны үрэвсэл их оношлогдож байна. Гурван хүүхдэд хорт хавдрын шинж тэмдэг ажиглагдаж байна. Тархины хавдартай гэж сэжиглэгдэж байгаа бөгөөд эцсийн байдлаар онош баталгаажаагүй. Үүнийг дараагийн шатны нарийн шинжилгээ хийлгэснээр онош баталгаажна.
Олон нийтийн сүлжээгээр 0-17 насны хүүхдүүдэд 150 мянган төгрөгөөр үр ашиггүй шинжилгээ хйиж байна гэх мэдээлэл цацагдаад байна. Тийм зүйл байхгүй. 18-аас дээш насны дөрвөн багцад 60-150 мянган төгрөгийн шинжилгээ хийж байгаа. 0-17 насны хүүхэд оршин суугаа газрынхаа анхан шатны байгууллагад үзүүлэх бөгөөд үүнд ямар нэгэн үнэ төлбөр байхгүй.
0-5 насны хүүхдэд дөрөв, 6-17 насны хүүхдэд зургаан төрлийн шинжилгээ хийж байгаа. Бид зонхилон тохиолдож байгаа өвчлөлийн статистик мэдээлэл, судалгаанд тулгуурлаж багцалсан шинжилгээг гаргасан” гэлээ.
