“Татвар төлөгчдийн өдрүүд”-ийг тэмдэглэн өнгөрүүлэх тухай Татварын Ерөнхий Газраас мэдээлэл хийх үеэр тус газрын дарга Б.Заяабал сэтгүүлчдийн асуултад хариуллаа.
-НӨАТ-ын 10 хувийг бууруулах боломжтой юу?
-Олон улсын жишгээр улс орнуудыг НӨАТ-ын бага татвартай буюу 10 хувиас доош, дунд татвартай буюу 10-20 хувь, их татвартай буюу 20 хувиас дээш гэсэн гурван ангилалд хувааж үздэг. Үүнээс үзвэл манайх бага татвартайд багтаж байна. НӨАТ-ыг хэн төлж байна вэ гэдэг нь хамгийн чухал. Үүнийг хэрэглэгч буюу талх худалдан авч буй иргэн төлдөг. Одоогийн хуулиар 2 хувийг буцаан олгож байгаа.
Саяхан Шриланк Улс 14 хувийн татвараа 6 хувь бууруулж, 8 хувь болгосон бөгөөд үүнтэй холбоотойгоор төсвийн орлогын хомсдол үүсч, төр нь дампуурлаа зарласан. НӨАТ-ын татварын хувь хэмжээ хөдлөхийн цаана улс орны тусгаар тогтнол, бүх иргэдийн эрх ашгийн асуудал яригддаг учраас бодлогын хувьд зөв хандах шаардлагатай.
-НӨАТ-ын сугалааг болиулсан албан ёсны шийдвэр гарсан уу?
-Сангийн сайд үүрэг өгч, сугалааг болиулах шийдвэр гарсан. Гэхдээ тэр нь урт хугацааны биш, түр хугацааных. Сугалааг яаж зохион байгуулвал олон нийтэд хүрэхүйц байна гэдэг хэлбэрийг судлах үүрэг өгч, түр хугацаанд зогсоосон. Яаж шийдвэл илүү оновтой болох талаар судалж байна. Энэ ондоо багтааж дараагийн хувилбарыг танилцуулна.
