“Цусны цагаан эсийн хорт хавдар”-аар өвдсөн зургаан настай Б.Тэмүүлэн хүүгийн аав, эээж монголчуудаасаа тусламж хүсэж, Сүхбаатарын талбай дээр хандив цуглуулж байна.
Б.Тэмүүлэн хүү 2019 оноос хойш ЭХЭМҮТ-ийн Цусны тасагт химийн эмчилгээ хийлгэж байсан ч хорт хавдар нь дахилт өгсөн тул яаралтай чөмөг шилжүүлэн суулгах хагалгаанд орох шаардлагатай болжээ.
Хагалгааг Монголд хийх боломжгүй бөгөөд Турк улсад 520 сая төгрөгөөр мэс засалд орох боломжтой байгаа юм.
Хагалгаанд орохын тулд хүүгийн эгч, дүү болох өхөөрдөм жаахан охид донор болохоор бэлдэж байна. Н.Батзулын гэр бүл бүхий л хөрөнгөө зарж, найз нөхөд, хамаатнаасаа тусламж авсан ч 100 орчим сая төгрөг цуглуулсан байжээ.
Аргагүйн эрхэнд эцсийн найдвар тээн, элэг нэгт ард түмнээсээ хандив хүсэж, талбай дээр зогсох болсон юм. Тэдэнд нэг өдрийн хугацаанд 400 сая төгрөг цуглажээ.
“Эмнэлэгт байгаа хүү дээрээ нүүр бардам очиж чадахаар боллоо, Биднийг зогсолтгүй дэмжсэн дэмжсээр байгаа Монголынхоо ард түмэнд гэр бүлийнхээ зүгээс хүүгийнхээ өмнөөс маш их баярлалаа. Та бүгдийн минь буян заяа нь үрийн үрдээ дэлгэрч эрүүл энх саруул сайхан аз жаргалтай элэг бүтэн байхын ерөөлийг өргөж байна. Одоо ч биднийг дэмжсээр сэтгэлийн хандиваа өргөсөөр л байгаа ард түмэндээ дахин дахин талархаж байнаа. Бид хүүгээ бүрэн эмчлүүлээд ирэхэд магадгүй бидэнд мөнгө үлдсэн байвал нэг ч зоос үлдээлгүй дутаалгүйгээр Сайн үйлсэд зарцуулах болноо гэдгээ Хүүгийнхээ нэрийн өмнөөс амлаж байна. Баярлалаа та бүхэндээ” хэмээн итгэл, хайр дүүрэн харцаар инээмсэглэх эгэл жирийн аавын халуун дулаан яриаг хүргэе.