Коронавируст халдвар дэгдэж эхэлсэн цагаас эхлэн амны хаалт зүүх, гараа ариутгах, хүн хоорондын зайг барих зэрэг халдар, хамгааллын энгийн дүрмүүдийг баримталсаар ирсэн. Гэтэл өдөрт батлагдах халдварын тоо буурч, урин дулаан цаг ирсэн энэ үед иргэд амны хаалт зүүх нь багассан.
Зарим улс орнууд гадаа талбайд амны хаалт зүүх журмаа цуцалж байгаа талаараа мэдээллээд буй. Тухайлбал, Испанид энэ журам хэрэгжиж, нийтийн тээврийн хэрэгсэл болон эрүүл мэндийн төв, асрамжийн газар, эмнэлэг, эмийн сан зэрэг эмзэг бүлгийн хүмүүс байнга очдог газрууд, олныг хамарсан урлаг, спортын үйл ажиллагааны үеэр амны хаалт заавал зүүхийг зөвлөөд байгаа юм.
Манай улсын хувьд амны хаалтыг гадна орчинд зүүхгүй байж болох эсэх талаар нэгдсэн нэг журам хараахан гараагүй байна.
АШУҮИС-ийн Био-Анагаахын сургуулийн Дархлаа судлалын тэнхимийн дэд профессор, доктор С.Чимидцэрэн хэвлэлд өгсөн ярилцлагадаа коронавируст халдварын шинэ хувилбарууд гарч, вирус мутацлагдах эрсдэл байгааг онцолж, амны хаалтыг бүрмөсөн зүүхээ боль гэж одоогоор зөвлөхөд эрт байгааг сануулсан байна.
Мөн тэрбээр агаарын солилцоо хязгаарлагдмал нөхцөлд амны хаалт зүүх нь зөв. Гадаа задгай орчинд эрсдэл харьцангуй гайгүй ч хувь хүн бүр өөрийнхөө эрүүл мэндийг хамгаалж хариуцлагатай байх хэрэгтэй гэдгийг зөвлөжээ.