УИХ-ын Чуулганы хуралдаан эхэллээ. Хуралдаанаар хэлэлцэх асуудлын дарааллыг тогтоох үеэр УИХ-ын гишүүн Б.Пүрэвдорж саналаа хэллээ.
Тэрбээр “Тэтгэвэр тогтоохдоо 7 биш 5 жилийн цалингийн дунджаар тогтоох тухай хуулийн төслийг хэлэлцүүлэхийг шаардахад УИХ-ын дарга “Байнгын хороогоор наад асуудлаа ярь” гэдэг чиглэл өгсөн. Би МАН-ын гишүүн биш. Танай намын бүлгийн юу шийдсэнийг ерөөсөө дагах шаардлага байхгүй. Яагаад гэвэл би сөрөг хүчнийх.
УИХ-ын гишүүн хууль өргөн барьсан бол тэр хуулийг нь хэлэлцүүлэх ёстой гэдэг байр суурийг илэрхийлж байна. Тиймээс энэ хуулийн төслийг ирэх долоо хоногийн чуулганы хуралдаанаар хэлэлцүүлж өгөөч гэж хүсэж байна. Хэрэв ирэх долоо хоногийн хэлэлцэх асуудлын дараалалд оруулахгүй бол НББХ-ны дарга М.Оюунчимэгийн сонгогдсон Чингэлтэй дүүргийн Ялалтын талбай дээр ахмадуудтайгаа хамтраад жагсана. Цаашлаад УИХ-ын даргын сонгогдсон Баянхонгор аймагт очиж жагсана. Бүр болохгүй бол Ерөнхий сайд Л.Оюун-Эрдэнийн сонгогдсон Хэнтий нутагт очино. Түүнчлэн бүх аймаг, сумдад үргэлжлүүлнэ гэдгийг хэлье” гэлээ.
