Украины гадаад хэргийн сайд Дмитро Кулеба тус улсад Оросын эзлэн түрэмгийлэл эхэлснийг твиттер хуудсаараа мэдэгджээ. Тэрбээр “Путин дөнгөж сая Украиныг эзлэн түрэмгийлэх цогц ажиллагааг эхлүүллээ. Амар амгалан байсан Украины хотууд цохилтод өртөж байна. Энэ бол эзлэн түрэмгийлэх дайн. Украин улс өөрийгөө хамгаалж, ялалт байгуулах болно. Дэлхий дахин Путинийг зогсоож чадна, зогсоох ёстой. Хөдлөх цаг нь боллоо” гэсэн байна.
Түүнчлэн Украины томоохон хотуудад хүчтэй дэлбэрэлтийн чимээ дуулдаж эхэлсэн талаар CNN агентлаг мэдээлэв. Украины нийслэл Киев хотод байрлах тус агентлагийн сурвалжлагчид хотын зүүн зүгээс олон улсын нисэх онгоцны буудлын чиглэлд дэлбэрэлт болж байгааг сонссон байна.
Эх сурвалжуудын мэдээлснээр, Молдавын нутаг дэвсгэр, тэр дундаа Кишинев хотын дээгүүр Оросын пуужин нисчээ. Украины цэргийн байгууламжууд руу ОХУ пуужингаар цохилт өгч буй бчлэгүүд ил болоод байна.
Тун саяхан Украины Ерөнхийлөгч Владимир Зеленский улс даяар дайны цагийн бэлэн байдал зарлаж, ард түмэндээ хандаж мэдэгдэл хийлээ. Тэрбээр мэдэгдэлдээ “Украины олон хотод дэлбэрэлт боллоо. Тиймээс улс орны бүх нутаг дэвсгэрт дайны цагийн бэлэн байдал тогтоолоо” хэмээв.
