Олимпын шинэхэн аварга Анна Щербакова Бээжин-2022 өвлийн олимпын уран гулгалтын тэмцээний эмэгтэйчүүдийн ганцаарчилсан төрөл өчигдөр болж, Оросын уран гулгагч Анна Щербакова богино болон чөлөөт үзүүлбэрүүдийн нийлбэр дүнгээр (255.95 оноо) алтан медаль хүртлээ.
Анна Станиславовна Щербакова 2004 оны 3 сарын 28-нд Москва хотод төржээ. Тэрбээр уран гулгалтын 2022 оны олимпын аварга, 2021 оны дэлхийн аварга юм. Үүнээс гадна Европын аварга шалгаруулах тэмцээний хошой мөнгөн медальт, ОХУ-ын гурван удаагийн аварга болж байсан нэгэн.
Анна Щербакова гурван нас гарантайдаа уран гулгалтын спортоор хичээллэж эхэлсэн бөгөөд эцэг эх нь түүнийг “Хрустальный” хэмээх спортын төвд явуулсан байна. Аннагийн анхны дасгалжуулагчид нь Юлия Красинская, Оксана Булычёва нар байв. Харин охин 2013 оны 11-р сараас эхлэн Этери Тутберидзегийн удирдлаган дор бэлтгэл хийж эхэлсэн байна. Этери Тутберидзе ОХУ-ын олимпын аваргуудыг дасгалжуулдаг гэдгээрээ алдартай нэгэн. Түүнийг хүмүүс “Мөсөн хатан хаан” гэх нь ч бий.
ОХУ-ын 2020 оны уран гулгалтын Аварга шалгаруулах тэмцээний эмэгтэй ганцаарчилсан төрөлд уран гулгагч Анна Щербакова тэргүүлж аварга болж байжээ. 16 настай Анна Щербаковагийн үзүүлбэр ёстой л төгс төгөлдөр, техникийн гайхамшигтай алдаагүй гүйцэтгэл болж, гулгалтын дараа хахир хатуу, хүйтэн гэгддэг Этери нулимс дуслуулж байв.
Анна дөрвөлсөн лутц, флип амжилттай гүйцэтгэн, Оросын насанд хүрэгчдийн аварга цолыг гурав дахиа хүртэж буй нь энэ юм.
Бээжин-2022 өвлийн олимпын уран гулгалтын тэмцээний эмэгтэйчүүдийн ганцаарчилсан төрөлд алтан медаль хүртсэн тэрбээр “Би гурван настай байхаасаа эхлэн уран гулгалтаар хичээллэж эхэлсэн учраас амьдралаа уран гулгалтгүйгээр төсөөлж чадахгүй. Олон зүйлс надад таалагддаг боловч юу ч уран гулгалт шиг сэтгэл догдлуулж, сонирхлыг минь татаж байгаагүй” хэмээжээ.
Анна ихэнх цагаа бэлтгэлдээ зарцуулдаг. Тэрбээр цахим хаяг, инстаграмм дээрээ өөрийн зургуудыг нийтэлж, хобби сонирхлынхоо талаар хуваалцдаг байна. Анна спорт, найз нөхөд, аялал, хайртай нохойнуудынхаа талаар зураг оруулж, сэтгэгдлээ хуваалцдаг аж.