“УБ Сонгдо” эмнэлгийн мэдрэлийн эмч Б.Оюунчимэг цус харвалт ба бүлэн уусгах эмчилгээний талаар мэдээлэл өглөө.
– Цус харвалт гэж юу вэ?
– Цус харвалт нь тархины судасны өвчин юм. Харвалт нь үндсэн хоёр механизмаар явагддаг. Нэгдүгээрт, судас харгарч, тархинд цус хуралт үүсэх. Үүнийг цусархаг цус харвалт гэж нэрлэдэг. Хоёрдугаарт, тархины судас бөглөрөөд тухайн тархины эдэд цус хомсрол үүсдэг. Үүнийг цус хомсрох цус харвалт гэнэ.
– Бүлэн уусгах эмчилгээний талаар мэдээлэл өгөөч. Ямар тохиолдолд энэ эмчилгээг хийдэг вэ?
– Тархины судасны бүлэн үүссэн хэсэгт цус хомсрол бий болдог. Энэ үед бүлэн уусгах эмчилгээг хийдэг. Энэ нь үр дүн сайтай, судсан дундуур хийгддэг тарилгын эмчилгээ юм. Манай улсад бүлэн уусгах эмчилгээг ашиглаад нэлээд удаж байна.
Энэхүү эмчилгээг цус хомсрох харвалтын заалттай хүмүүст хийнэ. Мөн энэ эмчилгээ нь бүлэнгээс үүдэн тархины эд гэмтэхээс хамгаалах маехинзм болдог. Цус хомсрох харвалт үүссэн эхний зургаан цагийн дотор нарийн мэргэжлийн эмч хийдэг эмчилгээ байгаа юм.
Харвалт гэдэг өвчин үлдэцтэй, тухайн хүнийг хөдөлмөрийн чадвар алдалтад хүргэдэг. Гэхдээ орчин үеийн эмчилгээгээр зарим төрлийн харвалт буюу судас бөглөрдөг, цус хомсрох харвалтыг эмчлэх боломжтой гэж үзэж байгаа.
– “УБ Сонгдо” эмнэлэгт даатгалын хөнгөлөлт хэрхэн хэрэгжиж байна вэ?
– Цус харвалтын эмчилгээг манай эмнэлэг даатгалаар хөнгөлөх болсон. Мөн зарим төрлийн мэдрэлийн өвчнүүдийн эмчилгээний төлбөрийг хөнгөлөхөөр тусгасан байгаа.
Эх сурвалж: УБ Сонгдо
