ТТАХНЭ-ийн Гэмтлийн тасгийн их эмч Б.Чинсанаа хүүхдийн осол гэмтлийн талаар статистик болон бусад мэдээллийг өглөө.
Гэмтлээс шалтгаалсан хүүхдийн өвчлөлийн статистик мэдээллийг эхлээд хүргэнэ үү?
– Сүүлийн таван жилийн хугацаанд осол гэмтлээс шалтгаалсан хүүхдийн өвчлөлийн 184 мянган тохиолдол бүртгэгдсэн. Осол, гэмтлээс шалтгаалан өвчилсөн хүүхдүүдийг хүйсийн хувьд аваад үзвэл эрэгтэй хүүхэд их байна. Учир нь өсвөр насны эрэгтэй хүүхдүүд илүү “хөдөлгөөнтэй” байдагтай холбоотой. Өөрөөр хэлбэл, спорт эсвэл нийгмийн харилцааны улмаас үүдэж байна.
Гэмтлийн шалтгаан нь юу байна вэ?
– Хүүхдийн осол гэмтлийн тэргүүлэх таван шалтгааны нэгдүгээрт, аливаа зүйлээс унаж, бэртэх тохиолдол орж байна.
Хоёрдугаарт, ахуйн хүрээний түлэгдэлтээс үүссэн гэмтэл
Гуравдугаарт, амьгүй механик зүйлд өртөж гэмтэх тохиолдол
Дөрөвдүгээрт, зам тээврийн осол
Тавдугаарт, тодорхойгүй зүйлээс бэртэх зэрэг байна.
Мөн түлэгдэлтийн шалтгаантай гэмтлийг насны ангиллаар нь авч үзвэл 4 хүртэл насныхан дийлэнх хувийг эзэлж байна. Механик хүчин зүйлийн улмаас бэртэж байгаа хүүхдийн дийлэнх нь мөн 1-4, 15-19 насны хүүхдүүд байдаг.
– Хүүхдийн гэмтэл дундаа толгойн гэмтэл хэдэн хувийг эзэлдэг вэ. Мөн бусад гэмтлүүдийн талаар мэдээлэл өгнө үү?
– Хүүхдийн гэмтэл дундаа толгойн гэмтэл 25 хувийг эзэлдэг. Учир нь унах, зам тээврийн ослын үед хүүхэд тархины гэмтэл түлхүү аваад байна. Мөн мөчдийн гэмтэл удаах байранд орно. Тухайлбал тохой, шуу, дээд доод мөчдийн гэмтэл 17 хувийг эзэлж байгаа бол шагай тавхайн гэмтэл 11 хувь, бугуй сарвуу, зөөлөн эдийн гэмтэл 10 хувийг эзэлдэг.