БНХАУ-ын нийслэл Бээжин хотод зохион байгуулагдах өвлийн олимпын XXIV наадмын нээлтэд оролцохоор Монгол Улсын Ерөнхий сайд Л.Оюун-Эрдэнэ өнөөдөр эх орноосоо мордсон юм.
Ерөнхий сайдын тусгай үүргийн нисэх онгоц Бээжин хотын олон улсын нисэх буудалд газардсан тухай Хятадын төв хэвлэлүүд саяхан мэдээлжээ.
Ерөнхий сайд Л.Оюун-Эрдэнийг “Капитал” олон улсын нисэх буудалд Монголын талаас Монгол Улсаас БНХАУ-д суугаа Онц бөгөөд Бүрэн Эрхт Элчин сайд Т.Бадрал болон ЭСЯ-ны дипломат ажилтнууд, БНХАУ-ын талаас тус улсын Гадаад хэргийн яамны туслах сайд Ү Жянхао нар тус тус угтан авлаа.
Айлчлалын хүрээнд Ерөнхий сайд Л.Оюун-Эрдэнэ БНХАУ-ын Төрийн Зөвлөлийн Ерөнхий сайд Ли Көчянтай албан ёсны уулзалт хийнэ. Түүний энэ удаагийн айлчлал хоёрдугаар сарын 3-8-ны өдрүүдэд үргэлжилнэ.
“Бээжин 2022” өвлийн олимпын наадмын нээлтийн ёслолын ажиллагаа Баасан гарагийн 20:00 цагт эхлэх юм.
Энэ удаагийн олимпын наадамд дэлхийн 91 улсын 3,000 орчим тамирчин өрсөлдөнө. Наадам хоёрдугаар сарын 20-ны өдөр өндөрлөх юм.
