АНУ-ын Халдвар өвчний хяналт, урьдчилан сэргийлэх төв болон Төрийн департаментаас даваа гаригт “COVID-19”-ийн тохиолдлын тоо эрчимтэй нэмэгдэж байгаатай холбогдуулан халдварын хамгийн өндөр эрсдэлтэй 15 улсад зорчихгүй, аялахгүй байхыг иргэддээ анхааруулжээ.
Тодруулбал, Колумб, Коста Рика, Доминиканы Бүгд Найрамдах Улс, Фижи, Ямайка, Гуадалупа, Кувейт, Монгол, Нигер, Перу, Румын, Сент Бартелеми, Сент Мартин, Тунис, АНЭУ-ыг халдварын маш өндөр эрсдэлтэй дөрөвдүгээр зэрэглэлийн жагсаалтад оруулж, аялж болохгүй орнууд гэж анхааруулжээ. Харин Япон, Энэтхэг, Конго, Гватемал, Мали, Киргиз, Сенегал зэрэг орнуудыг гуравдугаар зэрэглэлийн жагсаалтад багтааж, вакцин хийлгээгүй америкуудыг зорчихгүй, аялахгүй байхыг зөвлөсөн байна.
Хэдий Монгол Улсад коронавирусийн эсрэг вакцинжуулалт өндөр түвшинд байгаа ч АНУ-ын Төрийн департамент Монгол Улсыг аялахад маш өндөр эрсдэлтэй орон гэж үзээд дөрөвдүгээр зэрэглэлийн жагсаалтад оруулав. Эл шийдвэртэй холбоотойгоор Монгол Улсын иргэдийн АНУ-ын аяллын В1, В2 визний төлөвлөсөн ярилцлага болон шинээр виз мэдүүлэх үйл явц хойшилж магадгүй байгаа юм.
АНУ-ын Халдвар өвчний хяналт, урьдчилан сэргийлэх төвийн мэдээлснээр коронавирусийн омикрон хувилбар дэлхийн 115 орчим улс орон, нутаг дэвсгэрт тархсан бөгөөд аяллын гол бүс нутгуудад халдвар эрчтэй тархаж байгааг анхааруусан байна.