БНАСАУ-ын удирдагч асан Ким Чен Ир таалал төгссөнөөс хойш 10 жил тохиож байгаатай холбогдуулан Хойд Солонгост 11 өдрийн гашуудал зарлаж, инээх, төрсөн өдөр тэмдэглэх, талийгаачдаа нутаглуулах, дэлгүүр хэсэх, согтууруулах ундаа уухыг хоригложээ. Энэ талаар RFA мэдээлсэн байна.
Хойд Солонгосын Синыйжу хотын оршин суугч RFA-д ярихдаа эрх баригчид нь амралтын өдрөө өнгөрүүлэх, бараа бүтээгдэхүүн худалдан авахыг нь ч хориглосон гэнэ. Түүнчлэн өнгөрсөн жилийн гашуудлын өдрүүдийн үеэр согтууруулах ундаа хэрэглэсэн хүмүүсийг баривчилж байсан гэж эх сурвалж өгүүлжээ.
“Тэднийг үзэл суртлын гэмт хэрэгтнүүд гэж үзсэн. Тэднийг авч явснаас хойш хэн ч дахин хараагүй” хэмээн Хойд Солонгосын оршин суугч өгүүлсэн байна.
Түүнчлэн, гэр бүлийн гишүүдийн хэн нэгэн нь гашуудлын өдрүүдийн үеэр таалал төгсвөл оршуулах боломжгүй гэнэ. Мөн чангаар уйлахыг хориглосон бөгөөд гашуудлын өдрүүд дууссаны дараа л талийгаачдаа нутаглуулахыг зөвшөөрсөн аж.
Гашуудлын өдрүүдийн үеэр цагдаагийн тусгай хэсэг ажиллуулахаар томилсон гэж Өмнөд Хванхэ мужийн оршин суугч өгүүлжээ. Энэ тусгай хэсэг нь “олон нийтийн гашуудлын уур амьсгалд хор хохирол учруулсан хүмүүсийн асуудлыг шийдэх” үүрэгтэй гэнэ. Түүнчлэн хойд солонгосчууд орон гэргүй хүмүүст туслах үүрэг хүлээж, хоол хүнсний хомстолд орсон хүмүүст хүнс цуглуулж өгөх шаардлагатай болсон аж.
Ким Чен Ир 1994 онд эцэг Зим Ир Сенээ таалал төгссөний дараагаас БНАСАУ-ыг удирдсан. Тэрбээр 2011 онд таалал төгсөх хүртлээ улс орныг удирдсан бөгөөд Ким Чен Ирийг бие барсны дараа түүний хүү, өнөөгийн удирдагч Ким Жон Ун улсаа тэргүүлэх болсон юм.
