Энэ удаагийн “Хөтөч” булангаараа гэрэл зураг сонирхогчдын дагавал зохих юүтүб сувгуудыг танилцуулж байна. Дараах сувгууд нь хүссэн зургаа хэрхэн авахыг харуулахын зэрэгцээ гэрэл зураг авах чадварыг хөгжүүлж өгнө. Мөн объект болон нөхцөл байдалд тухайн техникийг хэрхэн ашиглаж болох тухай олон зөвлөгөөнүүдийг багтаасан. Мэргэжлийн гэрэл зурагчдын онлайн сургалтанд суух цаг зав хомс байгаа бол дараах сувгуудад зочилж, хэрэгтэй мэдээллээ олж авах боломжтой.
#1. Art of Photography
Тед Форбсын ажиллуулдаг энэхүү суваг олон жилийн турш хэрэгцээт мэдээллийг хүргэсээр ирсэн. Камер болон гэрэл зургийн талаарх өргөн ойлголтыг агуулсны зэрэгцээ харааны урлагийг хэрхэн төгөлдөржүүлэх зөвлөмж, арга техникийн талаар хуваалцдаг. Мөн сонирхолтой нь өөрийн сувагтаа бүтээлээ оруулах боломжийг санал болгодог.
#2. FStoppers
Энэ нь бүтээлч, мэргэжлийн хүмүүст ур чадвараа улам ахиулах боломжийг олгоно. Олон уран бүтээлчдийн хамтран ажиллуулдаг тус суваг гэрэл зураг, техниктэй холбоотой өргөн мэдээллээр хангана.
#3. Jessica Kobeissi
Энэхүү сувгаас та хөрөг зургийн талаар нарийн ойлголтуудыг хүлээн авах боломжтой. Араб-Америкийн гэрэл зурагчин Jessica Kobeissi хөрөг зураг хэрхэн дарах, дарсан зургаа хэрхэн засварлах тухай мэдээллийг танд хүргэнэ.
#4. Thomas Heaton
Хэрэв та аялах дуртай, ландшафтын гэрэл зураг сонирхдог бол энэхүү сувгийг дагаарай. Томас Хитон үзэсгэлэнт газруудаар аялангаа зураг дарж, аялалынхаа сонин сайхнаас хуваалцдаг. Бичлэгүүдэд түүний ашигладаг багаж хэрэгслээс эхлээд хэцүү байршилд тулгарч буй бэрхшээлүүд, түүнийг шийдэх арга замыг багтаажээ.
#5. Mango Street
Энэ нь гэрэл зураг сонирхогч, энэ чиглэлээр суралцахыг зорьж буй хүмүүст илүү тохиромжтой. Богино бөгөөд оновчтой шийдэл бүхий бичлэгүүдийг хүргэдэг. Сувгийн өвөрмөц хэв маяг нь таныг уйдаахгүй.
#6. Sean Tucker
Тэр дагагчдынхаа эрэлт хэрэгцээнд нийцсэн контентуудыг бүтээдэг. Түүний бүтээж буй видео контентууд чанарын хувьд киноноос дутхааргүй бөгөөд хийж буй ажилдаа сэтгэл хөдлөлийн элементүүдийг шингээхийн ач холбогдлын талаар мэдээлэл хүргэнэ.
#7. Jamie Windsor
Гэрэл зургийн талаар илүү ихийг мэдэхийг хүссэн хэн бүхэнд зориулагдсан тус суваг гэрэлтүүлэг, өнгөний талаарх хичээлүүдийг багтаажээ. Мөн мэдээж олон төрлийн бүтээлч санаануудыг туршиж үзэх боломжийг олгоно.
#8. The Slanted Lens
Энэхүү суваг нь ур чадвараа дээшлүүлэх, өөрийгөө хөгжүүлэх хүсэлтэй гэрэл зурагчдад алхам алхмаар зааварчилгаа өгдөг.
#9. B&H Photo Video
Тус сувгийг АНУ-ын томоохон гэрэл зургийн студи ажиллуулдаг бөгөөд танд хэрэгцээт, өргөн цар хүрээний мэдлэгийг олгоно. Мөн төгс бүтээлийг бий болгоход тохиромжтой төхөөрөмжийн үзүүлэлтүүдийн талаар танилцуулна.
#10. Peter McKinnon
Гэрэл зурагчдын таашаалд нийцсэн энэхүү сувгаас урлагийн талаарх нарийн ойлголтуудыг олж мэдэх боломжтой.