ТТАНЭ-ийн уламжлалт анагаах ухааны тасгийн их эмч Л.Санжаасүрэнгийн өгсөн мэдээллийг хүргэж байна.
– Хамар битүүрэх нь ямар шалтгаантай вэ. Хамар байнга битүү явах нь сөрөг нөлөөтэй юу?
– Хамар бол амьсгалын чухал эрхтэн. Дөрвөн хос буюу найман хөндийгөөс тогтдог. Хүн амьсгал авахад тухайн хөндийнүүдээр агаар чөлөөтэй сэлгэж байх ёстой. Хамар нь агаарыг дамжуулах, чийгшүүлэх, бүлээцүүлэх үүрэгтэй. Энэ үүрэг алдагдаад ирэхээр гайморит буюу хамар дайврын үрэвсэл үүсдэг. Сүүлийн жилүүдэд Монголчуудын дунд хамар дайврын үрэвсэл ихэссэн. Энэ нь гадаад шалтгааны улмаас үүсч байна. Гадаад шалтгаан нь хэт их суурьшмал байдалтай холбоотой. Өөрөөр хэлбэл тоос тоосонцор, утаа униар нөлөөлдөг гэсэн үг. Хамар битүүрэх шалтгааныг үйл ажиллагааны гаралтай, бүтцийн гаралтай гэж хоёр ангилж үздэг.
Үйл ажиллагааны гаралтай гэдэгт
- Вирус
- Мөөгөнцрийн халдвар- Мөөгөнцрийн халдвар нь хамрын дайвар үрэвслийн 70-80 хувийг үүсгэдэг.
- Харшлын үеийн дархлаа сулралт
- Хамрын хөндийн үрэвсэл зэрэг багтана.
Бүтцийн гаралтай
- Хамрын муруйлт
- Хамрын гэмтэл
- Хамрын самалдагийн томрол
- Шүдний халдвар
- Хамрын хөндийн хавдар /Ховор тохиолдолд/ зэрэг багтана.
– Хамар битүүрээд удаан явснаар ямар шинжүүд илэрч болох вэ?
– 1. Өтгөн ногоон нус гарна – Гайморийн хөндийд үрэвсэл явагдаад нус хамраар гарах, эсвэл хойшоо залгиур руу орж болно.
2. Үнэр мэдрэмж өөрчлөгддөг- Хамарт онцгүй үнэр үнэртэж эхэлдэг.
3. Амт өөрчлөгддөг- Эвгүй амт мэдрэгдэнэ.
4. Нүүрний яс шанааруу өвддөг- Бөхийх үед чинэрч, лугшиж өвддөг.
5 Халуурах, толгой өвдөх
6. Зовхи хавагнах шинж илэрч болно.
– Хамрыг хэрхэн зөв цэвэрлэх ёстой вэ?
-30-48 градус халуунтай 500 мл усанд нэг цайны халбага давс хийгээд уусмал бэлдэнэ. Уг уусмалыг зориулалтын хамрын гүцэнд /гүц байхгүй бол 20 гр зүйгүй тариур ашиглаж болно/ хийгээд нэг хамрын нүхрүү гүцний хошууг хийн шахаж угаана. Угааж байх явцад ярих, шүлс залгих хөдөлгөөн хийж болохгүй.
Мөн хамрын хурц үрэвсэл, давтан цус гарч байгаа тохиолдолд хамрыг угааж болохгүй гэдгийг анхаарах хэрэгтэй. Түүнчлэн саяын бэлдсэн уусмалд орсон найрлагаас харшилтай бол угааж болохгүй. Хамраа угааснаар гайморит, харшил, амьсгалын дээд замын өвчнөөс урьдчилан сэргийлэх ач холбогдолтой.
-Баярлалаа.
