“Чихрийн шижин ба чихрийн шижингийн ретиннипатийн тусламж үйлчилгээний загвар бий болгох” уг төслийн хүрээнд гүйцэтгэгч эмнэлгүүдэд оношилгоо эмчилгээний багаж хүлээлгэн өгөх ёслолын үйл ажиллагаа боллоо. Уг үйл ажиллагаанд Эрүүл мэндийн сайд С.Энхболд, УНТЭ-ийн ерөнхий захирал Б.Хишигжаргал, Орбис Интернейшнл байгууллагыг төлөөлж Монгол дахь газрын төлөөлөгчийн дарга Чимгээ нар оролцлоо. Үйл ажиллагааг нээж Эрүүл мэндийн сайд С.Энхболд үг хэлэв.
Монгол улсад өвчлөл, эндэгдлийн зонхилох хувийг эзэлж буй халдварт бус өвчин, үүний дотроос чихрийн шижин, түүний шалтгаант нүдний хүндрэлд чиглэсэн тусламж, үйлчилгээний загвар бий болгох төслийн нээлтийн үйл ажиллагаанд оролцож байгаадаа баяртай байна. Үүний ялдамд 30 гаруй жилийн туршид манай улсад нүдний тусламж үйлчилгээг сайжруулахад Эрүүл мэндийн яамтай хамтран ажиллаж байгаа Орбис Интернейшнл олон улсын байгууллагад гүнээ талархаж байгаагаа илэрхийлье.
Монгол улсад чихрийн шижин өвчин нь дангаараа дотоод шүүрэл, тэжээлийн бодисын солилцооны өвчлөлийн 41 хувийг эзэлж, тархалтын түвшин нь 8 гаруй хувьтай байна. Судалгаанаас үзэхэд 20-79 насны 1000 хүн амд 99.3 тохиолдол буюу насанд хүрсэн 20 хүний нэг нь чихрийн шижин өвчтэй байна. Нийт тохиолдлын 71.3 хувь нь оношлогдоогүй, жилд 1330 хүн уг өвчний улмаас нас барах магадлалтай байна.
Харин чихрийн шижингийн ретинопатийн тархалт 22.3 хувьтай, түүнээс шалтгаалсан эргэж сэргэшгүй хараа алдалт 6.2 орчим хувийг эзэлж байна. Гэтэл эдгээр эмгэг байдлаас бүрэн сэргийлэх боломжтой юм. Иймээс эрүүл мэндийн салбарын хувьд чихрийн шижингийн урьдал үедээ байгаа, өвчих нь оношлогдсон, хүндрэл илэрсэн хүмүүсийн өвөрмөц хэрэгцээнд нийцсэн олон мэргэжлийн эмч нарын нэгдмэл багийн тусламж, үйлчилгээ, хяналтын тогтолцоог бүрдүүлэх, цаашлаад иргэнийг нийгмийн хамгаалал талаас хамтран дэмжих тогтолцоог бий болгон сайжруулахад онцгой анхаарах хэрэгтэй байна хэмээн онцлон тэмдэглэв.
“Чихрийн шижин ба чихрийн шижингийн рептинопатийн тусламж үйлчилгээний загвар бий болгох” төсөл нь үйлчлүүлэгчийн хэрэгцээнд бүрэн нийцсэн, эмнэлгийн тоног төхөөрөмж, технологид суурилсан шинэлэг, өвөрмөц тусламж, үйлчилгээний загварыг бий болгон туршиж үзэх боломжтой боллоо.
УНТЭ-ийн хамт олон та бүхнийг Монгол улсад мэс заслын өвчний эрт илрүүллэг, оношилгоо, эмчилгээ болон хяналтын тогтолцоог ахисан шатанд гаргахад дорвитой хувь нэмэр оруулна гэдэгт итгэж байна. Эрүүл мэндийн яамнаас дэмжин ажиллах болно хэмээн Эрүүл мэндийн сайд С.Энхболд хэлсэн үгэндээ онцлов.
“Чихрийн шижин ба чихрийн шижингийн ретинопатийн тусламж үйлчилгээний загвар бий болгох” төслийн хэрэгжих хугацаа нь 2020-2023 он хүртэл. Уг төсөл УНТЭ, УГТЭ, Чингэлтэй дүүргийн Эрүүл мэндийн төв , Ховд аймгийн Эрүүл мэндийн газар, Дархан-Уул аймгийн Эрүүл мэндийн газар, АШУҮИС-ийн Төв эмнэлгүүдэд төсөл хэрэгжиж байна. Ховд, Дархан-Уул аймгууд цахим хэлбэрээр оролцлоо.
Эх сурвалж: ЭМЯ