Эрүүл мэндийн газрын дарга Л.Энхсайхан хөл хорионы хугацаанд дархлаагаа хэрхэн дэмжих талаар дараах зөвлөгөөг өглөө.
Тэрээр “Хөл хорионы хугацаанд дасгал хөдөлгөөн хийж, дархлаагаа дэмжих хэрэгтэй. Ялангуяа сунгалтын дасгал хийх тусам хүний биеийн цусны эргэлт сайжирдаг. Хүний биед 1,000 гаруй тунгалгийн зангилаа байдаг бөгөөд түүнийг сунгалтын дасгалаар сайн ажиллуулснаар хортой бодисыг биеэс гадагшлуулахад тустай. Мөн архи, тамхины хэрэглээгээ багасгах хэрэгтэй. Түүнчлэн дархлаагаа дэмжихийн тулд гэртээ агаар сайн оруулж, цайраар баялаг хүнс хэрэглээрэй” гэсэн юм.
Мөн тэрээр “Хөл хорионы үеэр шөнө унтаж чаддаггүй хүмүүс олон ажиглагддаг. Тэдгээр хүмүүст зөвлөхөд, шөнийн цагаар гар утас их оролдох нь нүдний мэдрэлийн ядаргаа үүсгэдэг. Тодруулбал, шөнийн цагаар утасны цэнхэр гэрлийг удаан хугацаагаар харах нь нүдний харааны эсүүдийг дахин сэргэхгүйгээр гэмтээх аюултай. Учир нь дэлгэцийн цэнхэр гэрлийг их харахад тархинд өдөр болсон мэт мэдрэмж төрж байдаг. Ингэхээр тархи амралтын байдалд орж чаддаггүй буюу биед мелотанин ялгардаггүй” гэдгийг хэллээ.