Хэрэгтэй мэдээ, мэдээллийг хүргэдэг “Хөтөч” буландаа хеликобактерийн шинжилгээ авах эмнэлгүүд, үнэ тарифын талаар бэлтгэлээ.
Хеликобактери пилори нь спирал хэлбэртэй, 5х3 микрометр хэмжээтэй, нэг талын төгсгөлдөө 4-6 ширхэг шилбүүртэй ба түүнийхээ тусламжаар хөдөлдөг, ходоодны салст бүрхүүлд амьдарч, ходоод 12 хуруу гэдэсний архаг өвчин үүсгэдэг нян юм.
Шинж тэмдэг
Ихэвчлэн шинж тэмдэггүй явагддаг бөгөөд зарим тохиолдолд доорх шинжүүд илэрнэ. Үүнд:
Хоолонд дургүй болох
Цанхайх
Биеийн жин буурах
Амнаас эвгүй үнэртэх
Хооллох үед болон шөнийн цагаар хэвлийгээр өвдөх
Дотор муухай оргих
Бөөлжих шинжүүд илэрвэл хеликобактерийн халдварын шинж байж болох тул та эмчид хандах хэрэгтэй.
Хеликобактерийн халдварыг оношлох аргууд
1. Өтгөнд хеликобактерийн антиген илрүүлэх
2. Амьсгалын сорил
3. Ходоодны дуран
4. Дуранд суурилсан уреазын түргэвчилсэн сорил
5. Цусанд хеликобактерийн эсрэг бие илрүүлэх зэрэг шинжилгээнүүдийг хийдэг.
Хэрэв амьсгалаар шинжилгээ өгөх бол өлөн байх, тамхи татаагүй, бохь зажлаагүй байхыг анхаарах хэрэгтэй.
Улсын нэгдүгээр төв эмнэлэг
Улсын нэгдүгээр төв эмнэлгийн лабориториос тодруулахад уг шинжилгээг авдаггүй гэв.
Улсын хоёрдугаар төв эмнэлэг
Тус эмнэлэгт өтгөнд хеликобактерийн антиген илрүүлэх шинжилгээг хийж байна. Заавал 13А маягт шаардлагатай. Үнэ нь 35,000 төгрөг. Урьдчилж цаг захиална.
Цаг захиалах, холбоо барих утас: 70150222, 70150234
Улсын Гуравдугаар төв эмэнэлэг
Тус эмнэлгийн “Эмнэлгийн төлбөртэй тусламж үйлчилгээний үнийн жишиг батлах тухай” А/25-р тушаалд;
H.Pilory /Ходоодны шархлааны маркер/- 10,000 төгрөг
Хеликобактер LgG шинжилгээ- 40,000 гэжээ.
Цаг авах, лавлах утас: 7704-6666
ИНТЕРМЕД эмнэлэг
Эмнэлэгт нэвтрэх бол сүүлийн 72 цагт өгсөн PCR, эсвэл Интермед эмнэлгийн түргэвчилсэн шинжилгээ өгсөн байх шаардлагатай.
Хеликобактерийн шинжилгээг өтгөнөөр болон амьсгалаар авч байна.
Үнэ: Өтгөнөөр- 27,700
Амьсгалаар- 65,000 төгрөг бөгөөд урьдчилж цаг авах шаардлагагүй.
Амьсгалаар өгсөн бол хариу 30-40 минутын дараа, өтгөнөөр бол 3-4 цагийн дараа гарна.
Дэлгэрэнгүй мэдээллийг 7701 1111 утсаар холбогдож авах боломжтой.
УБ СОНГДО эмнэлэг
Тус эмнэлэгт хеликобактерийн шинжилгээг 3 төрлөөр авч байна.
Үнэ: Өтгөнөөр- 14,000
Цусаар- 25,000
Амьсгалаар- 60,000 төгрөг. Шинжилгээ авахын тулд урьдчилж цаг авах шаардлагагүй.
Дэлгэрэнгүй мэдээллийг 75752727 утсаар лавлана уу.
ГРАНДМЕД эмнэлэг
Тус эмнэлэгт хеликбактерийн шинжилгээг цусаар, өтгөнөөр, амьсгалаар гэсэн гурван төрлөөр авч байна.
Үнэ: Өтгөнөөр- 15,000 бөгөөд хариу нь өдөртөө гарна.
Амьсгалаар өгөх шинжилгээ- 55,000 бөгөөд хариу нь 15 минутанд гарна.
Шинжилгээ өгөхийн тулд сүүлийн 72 цагийн дотор PCR шинжилгээнд хамрагдсан, “сөрөг” хариутай байх шаардлагатай.
Дэлгэрэнгүй мэдээллийг: 7700-0066 дугаарт холбогдож авна уу.
МӨНГӨН ГҮҮР эмнэлэг
Тус эмнэлэгт амьсгалын сорилоор хеликобактерийн шинжилгээг авч байна.
Үнэ: 60,000 төгрөг
Шинжилгээний цаг урьдчилж авах шаардлагагүй.
Дэлгэрэнгүй мэдээллийг: 7708 0303 утсаар холбогдож авах боломжтой.