Телевизийн олон ангит “Халтар царайт” киног 1992 онд Венесуэлийн Venevision кино компани бүтээсэн бөгөөд тухайн үедээ шуугиан тарьж, дэлхийн олон оронд гарсан юм. Тус киноны Стрелитагийн дүрд тоглосон жүжигчин Соня Элеонора Смитийг “Хүмүүс” буландаа онцолж байна.
Соня Элеонора Смит удам дагасан жүжигчин юм. Ээж Илеана Жаке нь Венесуэлийн алдартай кино жүжигчдийн нэг. Соня кино зураг авалт руу ээжийгээ дагаж очдог байсан нь жүжигчний мэргэжлийг сонгоход нөлөөлжээ
Соня Смит 1972 онд Пеньселваня мужийн Филадельфи хотод төрсөн. Эцэг эх нь Соняг бага байхад хоёр тийш болсон бөгөөд Илеана Жаке охиноо дагуулаад Венесуэлд буцан иржээ. Соня Испани орчинд өссөн учир Испаниар чөлөөтэй ярьж, бас Герман, Англиар ярьж, бичдэг.
Коллежид сэтгэлзүйн чиглэлээр суралцдаг байхдаа “Халтар царайт” кинонд тоглосон нь түүнд маш их нэр алдрыг хайрлаж, жүжигчний амьдралыг эргэлт буцалтгүйгээр сонгоход хүргэсэн гэдэг.
Чинээлэг айлын хүү Мигиел Ангел, Гонзалес ядуусын хорооллын, сонин зардаг үзэсгэлэнт охин Стрелитад анхны харцаар дурлана. Тус хотын нэр нөлөө бүхий баян айлын том хүү гудамжны халтар царайттай хайр сэтгэлийн холбоотой болсон нь бүх үйл явдлын эхлэл болдог. Хэдий хайр дурлалд нь саад бэрхшээл, мэхлэлт тохиолддог ч хосууд эцэст нь уулзаж, үлдсэн амьдралаа хамтдаа өнгөрүүлэхээр болж кино дуусдаг.
Уг киноны үйл явдлыг уншигчид маань одоо хэр нь санаж байгаа байх. Тус киноны гол дүр болох “Халтар царайт” буюу жүжигчин Смит нь зөвхөн Венесуэльд төдийгүй кино гарч байсан олон оронд алдартай болсон юм.
12 настайгаасаа кинонд тоглож жүжигчний замналаа эхлүүлсэн ч түүнийг алдар хүндтэй болоход “Халтар царайт” кино нөлөөлсөн гэдэг. Улмаар, Соня Смит Холливудад данстай жүжигчин болж олон уран сайхны кино, жүжиг, телевизийн цувралд гол болон туслах дүр бүтээсэн байна.
Хувийн амьдрал
Жүжигчний хувийн амьдрал их нууцлаг. Тэрээр олон нийтэд амьдралынхаа талаар дэлгэхийн хүсдэггүй нэгэн. Соня Элеонора Смит “Олвидартэ Жамас” кинонд хамтран тоглосон Мексикийн жүжигчин, Габриел Поррастай гэрлэсэн. Тэд 2008 оны хоёрдугаар сард хуримаа нууцаар хийсэн гэдэг.
Харамсалтай нь хосууд 2013 оны 6-р сард хоёр тийш болжээ. Түүний нөхөр Габриэл, харамсаж байгаагаа илэрхийлж, Соняаг зөвхөн эмэгтэй хүн төдийгүй уран бүтээлчийн хувьд маш их хүндэлдэг хэвээр байгаагаа хэлсэн байдаг.
Үүний дараа Соня Мексикийн жүжигчин, загвар өмсөгч, балетчин Рикардо Чавестай болзож эхэлжээ. Жүжигчин Соня 48 настай бол сүйт залуу Чавес нь 55 настай юм.