- Өдөрт удаан хугацаагаар сууж, хөдөлгөөнгүй байх нь цэвэршилтийн дараах үеийн эмэгтэйчүүдийн зүрх судасны өвчинд нэрвэгдэх эрсдэлийг нэмэгдүүлдэг.
- Эмэгтэйчүүдэд тохиолдох зүрх судасны өвчний шинж тэмдгүүд нь цэвэршилтийн дараа илүү мэдрэгдэж, нас ахих тусам зүрх судасны өвчнөөр өвчлөх эрсдэл хүн бүрт нэмэгддэг байна. Тиймээс зүрхний эрүүл мэндэд тустай дараах зүйлсийг анхаараарай.
Зүрхний эрүүл мэндээ хамгаалахын тулд дасгал хөдөлгөөн хийгээрэй
Дасгал нь зүрх судасны өвчин, тархины цус харвалт, чихрийн шижингийн 2 хэлбэрийн эрсдэлийг бууруулахаас эхлээд ясыг бэхжүүлж, сэтгэцийн эрүүл мэндийг сайжруулах хүртэл мэндэд маш их ашиг тустай байдаг.
Орчин үеийн амьдралын хэв маяг, хөдөлгөөнгүй байдал нь бидний эрүүл мэндэд сөргөөр нөлөөлж байна. Тэр дундаа зүрх судасны өвчнөөр өвчлөх эрсдэлийг нэмэгдүүлдэг гэсэн судалгаа олон байдаг.
Судлаачид цэвэршилтийн дараах илүүдэл жинтэй, хэт таргалалттай эмэгтэйчүүд өдрийнхөө ихэнх цагийг сууж өнгөрүүлдэг нь зүрх судасны өвчин тусах метаболизмын эрсдэлт хүчин зүйлд нөлөөлдөг гэжээ.
Хөдөлгөөнгүй байх нь зүрхний өвчин тусах эрсдэлд хүргэдэг
Судлаачид 102 испани эмэгтэй, 416 өөр орны эмэгтэйчүүдийн хөдөлгөөний байдлыг судалсан байна. Хоёр бүлгийн эмэгтэйчүүд цэвэршилтийн дараах үедээ байсан ба илүүдэл жин, таргалалттай хүмүүс юм. Судлаачид эмэгтэйчүүдийн талаарх мэдээллийг гурван тусдаа хэсэгт хуваасан бөгөөд хөдөлгөөнийг ижил аргаар хэмжсэн байна. Үүнд эмэгтэйчүүдийн өдөрт суусан нийт хугацаа, хөдөлгөөний дундаж, үргэлжлэх хугацааг хоёуланг нь багтаажээ.
Тэд эмэгтэйчүүдийн зүрх судасны өвчний шинж тэмдгүүд нь цэвэршилтийн дараа илүү их мэдрэгддэг бөгөөд нас ахих тусам зүрх судасны өвчнөөр өвчлөх эрсдэл хүн бүрт нэмэгддэг болохийг тогтоожээ.
Мөн тэд цэвэршилтийн дараах энэхүү байдал нь эстроген дааврын түвшин буурсантай холбоотой байж болох юм хэмээн тайлбарласан байна.
Судалгаагаар өдрийн ихэнх цагийг сууж өнгөрүүлдэг эмэгтэйчүүдэд зүрх судасны өвчинтэй холбоотой биомаркерууд нь илүү муу үр дүн үзүүлжээ. Үүнд биеийн жингийн индекс (БЖИ), бүсэлхийн тойрог, глюкоз, инсулины эсэргүүцэл ба триглицерид орно. Тиймээс судлаачид дасгал хөдөлгөөн хийхийг уриалж байна.
Өдрийн турш илүү их хөдөлгөөн хийхийг зорь
Судлаачид хөдөлгөөнгүй байх нь испани болон нөгөө бүлгийн эмэгтэйчүүдэд хэрхэн өөрөөр нөлөөлдөг болохийг судалжээ. Испани гаралтай эмэгтэйчүүд нөгөө бүлгийн хүмүсээс харьцангүй хөдөлгөөнтэй байв. Гэхдээ хөдөлгөөний үргэлжлэх хугацаа ба мацаг барилт цусан дахь глюкозын хоорондын хамаарлаас аваад үзвэл нөгөө бүлгийн эмэгтэйчүүд илүү байжээ. Тиймээс 30 минут тутамд босоод ямар нэг хөдөлгөөн хийх хэрэгтэй гэж зөвлөж байна.
Судлаачид хэлэхдээ “та шатаар өгсөж уруудах гэх мэт зүйлийг хийснээр зүрхнийхээ цохилтыг нэгэн зэрэг нэмэгдүүлэх боломжтой” гэжээ.
“Хөдөлгөөнгүй байх нь бодисын солилцоо, зүрхний өвчин үүсгэх эрсдэлт хүчин зүйлүүдэд маш их нөлөө үзүүлдэг. Иймд биеийн тамирын дасгал нь бидний өдөр тутмын амьдралын нэг хэсэг байх ёстой”.
Эх сурвалж:healthline
