Дуучин Алла Пугачёва хүү, охины хамт Израиль руу ниссэн байна. Алла энэ удаад эргэж эх орондоо ирэхгүйгээр явсан байж магадгүй гэх таамгийг олон хүн дэвшүүлсэн. Дуучин буцаж ирэх тийз захиалахгүйгээр чартер нислэгээр Израилийг зорьжээ.
Оросын нэрт дуучин Алла Пугачевагийн нөхөр Максим Галкиныг Украины нэрийн өмнөөс улс төрийн үйл ажиллагаа явуулж, санхүүжилт авсан гэх үндэслэлээр ОХУ-ын хууль зүйн яамнаас түүнийг “гадаадын тагнуулч”-ийн бүртгэлд оруулсан билээ.
Учир нь Максим Галкин Орос Украины дайныг эсэргүүцэж, “Би яг одоо юу мэдэрч буйгаа үгээр илэрхийлж чадахгүй байна. Ийм зүйл яаж байж болдог юм бэ? Дайныг зөвтгөх ямар ч үндэслэл байхгүй. Дайнд үгүй гэж хэлье” хэмээн инстаграм хуудастаа бичиж байжээ. Иймд дуучин Алла Пугачева инстаграм хуудсаараа дамжуулан нөхөртэйгээ адилхан “гадаад тагнуулч”-ийн жагсаалтад орох хүсэлтэй байгаагаа 3,5 сая дагагчтэй инстаграм хуудастаа мэдэгдсэн юм.
Тэгвэл Аллагийн найз, хөгжмийн мэргэжилтэн Артемий Троицкий Пугачёваг эх орондоо ирээд сар л болоод эргээд явсныг ийнхүү тайлбарласан байна. Тэрбээр “Аллаг Москвад байхад Хуульзүйн яам Максим Галкиныг гадаадын тагнуул гэж нэрлэсэн. Хуульзүйн яам Галкиныг Украинаас санхүүжилт авсан гэж үзэж, Алла хайртай нөхрөө өмөөрөн Украин дахь цэргийн ажиллагааг эсэргүүцэж буйгаа хэлэхээс өөр аргагүйд хүрсэн. Тэр нөхрөөсөө урваж чадаагүй” гэжээ.
