НЭМГ-ын харьяа Наркологийн эмнэлгээс ганга өвсний ач холбогдлын талаар мэдээлэл өглөө.
Ганга өвсний ач холбогдол
Ганга өвс нь архины дуршил дарж, архинд донтох өвчний I, II, III үе болон шартах хам шинжийг үгүй болгоно. Үүнээс гадна тайвшруулах үйлчилгээтэйг Монголын эрдэмтэд судалгаагаар нотолжээ. Иймд Наркологийн эмнэлэг ганга өвсийг эмчилгээндээ байнга хэрэглэдэг байна.
Ганга өвс нь архи уух дурыг дарж, архины хордлого тайлах, хордлого тайлах эмчилгээний үр дүнг сайжруулдаг. Ийм учраас сэтгэл санааны байдлыг тогтворжуулах, сэтгэцийн хэвийн байдлыг хадгалах, тайвшруулах, алжаал тайлах, нийгэм хамт олонтой харилцах харилцаа хандлагыг сэргээх, сэдэлжүүлэх зорилгоор гангатай усан ванн эмчилгээг ганганы ханд уулгаж хордлого тайлах эмчилгээтэй хослуулан хийдэг аж.
Ганга өвс нь амьсгалын дээд, доод замын халдварт өвчнүүдэд нэн сайн. Ганга өвсний тос нь ариутгагч, нян устгагч чанартай, хамгийн хүчтэй антиоксидантуудын нэг учраас олон талаар нь анагаах ухаанд хэрэглэж иржээ.
Ганганд агуулагдах олон төрлийн бодис нь арьсны гадаргуу дээрх болон биеийн доторх олон төрлийн халдварыг устгаж, ариутгах чанарыг бий болгодог. Мөн ганга өвс нь нянгийн эсрэг, нянгийн үржлийн эсрэг үйлчилгээтэй учраас ходоодны үрэвсэл, шээсний сүв, бэлэг эрхтний нянгийн үрэвслүүд, амьсгалын замд хуралдсан нян бактериудыг устгаж, халдвар орсон шархыг эмчилдэг байна.
Ганга өвс нь биеийн бүхий л үйл ажиллагааг сэргээдэг. Байнгын бухимдал нь даралт ихсэх, ходоодны өвчлөлд өртөх, нойргүйдэх зэрэг өвчнийг дагуулдаг учраас өдөр бүр хэрэглэж өөрийгөө тайвшруулах хэрэгтэй. Ганга өвс нь хамрын ханиадын үед цээжний хөндийн болон хоолойн халдварыг эмчилж, хамар битүүрлийг арилгадаг. Ганга өвсийг дээрх өвчлөлүүдэд ханд бэлтгэж, утлага хийж, хоолойгоо зайлах зэргээр ашиглаж болно.
Ханд бэлтгэх
- Хатаасан ганга өвс -15гр
- Буцалсан халуун ус -500гр
Уг ургамал дээрээ буцламгай усаа хийж 10-15 минут байлгах эсвэл буцалж буй усанд хатаасан ганга өвсөө хийж 15 минут буцалгаад өтгөрүүлж хандалж болно. Хандалсан өтгөн хандан дээр буцалсан ус хийж шингэлж ууна. Мөн нэг аяга халуун усанд 1 цайны халбага хатаасан ганга хийж, таглаад 10 минут байлгасны дараа ууж тус тус хэрэглэж болно.
Эх сурвалж: Наркологийн эмнэлэг
