ЭХЭМҮТ, ЧХХМЗТ-ийн хэл заслын эмч Н.Энхсумъяа сонсголын аппарат, дунгийн суулгацын талаар мэдээлэл өгснийг сийрүүлэн хүргэж байна.
Сонсголын аппарат болон дунгийн суулгацын талаар мэдээлэл өгнө үү?
Сонсгол бууралттай хүүхдэд сонсголын аппарат зүүлгэдэг бол таг дүлий хүүхдэд дунгийн суулгац хийнэ. Сонсголын аппарат, дунгийн суулгац нь ялгаатай л даа.
Тодруулбал, сонсголын аппарат нь дуу чимээг чангалж өгдөг бол дунгийн суулгац нь сонсголын эсийг орлодог гэсэн үг.
Сонсголын аппарат зүүдэг хүүхдийн юуг анхаарах ёстой вэ?
Сонсголын аппарат зүүдэг хүүхдийн тухайд, нүд нээлттэй бүх үед сонсголын аппаратыг зүүлгэх ёстой.
Сонсголын аппаратаа тогтмол зүүхгүй байснаар дуу авиаг дутуу сонсох, хэл яриа хөгжихгүй байх, с,ш гэх мэт дуу авиаг сонсохгүй байх аюултай. Мөн үг, үгийн төгсгөлийг дутуу хэлдэг, өндөр давтамжийн авиаг хэлэхгүй байх дутагдал үүсдэг.
Харин сонсголын аппаратаа тогтмол зүүснээр хүүхдийн хэл яриа хөгжиж, үгийг гүйцэт сонсох боломжтой.
Дунгийн суулгац суулгасан хүүхдийн юуг анхаарах вэ?
Дунгийн суулгац суулгалаа гээд шууд хэл яриа хөгждөг гэж ойлгож болохгүй л дээ.
Дунгийн суулгац нь сонсголын эсийг орлож, тухайн хүүхдэд дуу чимээ хүлээн авах боломжийг олгодог.
Дунгийн суулгац суулгасны дараа сонсгол, хэл ярианы засалд явснаар чимээ таньж, ялгаж сурдаг.
