УИХ-ын Нийгмийн бодлогын байнгын хорооны өнөөдрийн хуралдаанаар Цар тахлын омикрон хувилбарын нөхцөл байдлын талаар болон Эрүүл мэндийн байгууллагуудаас хэрэгжүүлж буй арга хэмжээ, халдварын дэгдэлтийг бууруулах арга зам, вакцинжуулалтын явц, үр нөлөөний талаар Эрүүл мэндийн сайд С.Энхболд мэдээлэл хийлээ. Мөн коронавируст халдвар /Ковид-19/-ын шинэ төрлийн Омикрон хувилбар, тархалтаас урьдчилан сэргийлэх арга хэмжээний талаар Улсын онцгой комиссын дэргэдэх Эрдэмтдийн зөвлөлийн мэдээллийг сонсов.
УИХ-ын гишүүн Д.Сарангэрэл:Омикроны эмнэл зүйн шинж нь ямар байгаа вэ.
Эрүүл мэндийн сайдын зөвлөх О.Батбаяр: Омикроны шинж тэмдгийг бүртгэдэг апплекэйшнүүд байдаг. Эдгээрээс хамгийн сайн бүртгэдэг нь Их Британы zoi гэдэг апплекэйшн байгаа. Үүнд бүртгэгдэж байгаа гол шинж тэмдэг нь томуу төст өвчинтэй төстэй, нус гоожих, ханиалгах, ядрах шинж тэмдгүүд голлож байна гэдэг мэдээлэл байна.
