БНСУ дахь Элчин сайд Ц.Эрдэнэтуяа, Консул Ц.Өнөрзаяа нарыг эгүүлэн татах асуудлаар өчигдөр Гадаад харилцааны Сайд Б.Батцэцэг дараах тодруулгыг хэвлэлийнхэнд өгсөн.
Тэрбээр, “БНСУ-д суух Монголын ЭСЯ болон Пусан хотын Консулын ажилтнууд хэрэг гараад таван сарын хугацаа өнгөрсөн байхад мэдээгүй байна гэдэг нэг талаасаа хариуцлагагүйн асуудал юм. Харин нөгөө талаас гадаадад амьдардаг иргэд хаана ямар асуудалд орсон, хэрхэн эрх нь зөрчигдсөн, хүчирхийлэлд өртсөн эсэх талаараа ЭСЯ-даа мэдээлдэггүй. БНСУ-д ажиллаж амьдардаг 50 мянга орчим иргэн байна. Иргэдийн санал хүсэлт, иргэдтэйгээ ажиллаж байгаа Элчин сайдын яамны үйл ажиллагаа хангалтгүй байна гэх гомдол нэлээд байдаг. Иймд зөвхөн энэ удаагийн хэргээр дээрх албан тушаалтнуудад хариуцлага тооцож байгаа явдал биш юм.
13 настай Монгол охинтой холбоотой асуудалд Солонгосын Засгийн газар, ГХЯ-ны сайдын түвшинд анхаарал хандуулж байгаа. Холбогдох албаныхан очиж ээж, охин хоёроос уучлал хүссэн. Уг хэргийг шударгаар шийдүүлэхийн тулд нэлээд анхаарч ажиллана гэдгээ хэлсэн.
Гадаад улсад оршин суугаа иргэддээ хандаж хэлэхэд ямар нэгэн асуудалд орох юм бол Элчин сайдын яамандаа итгэн, нэн даруй мэдэгдээч ээ. Хууль бусаар оршин сууга иргэд ямар ч албаны хүнтэй харьцахыг хүсдэггүй. Элчин сайдын яам хууль, эрхзүйн туслалцаа үзүүлнэ үү гэхээс барьж аваад Монгол руу буцаачихна гэсэн ойлголт байхгүй. Тийм түгээмэл буруу хандлага байна.
Элчин сайдын хувьд мэргэжлийн дипломатч, 26 жил Гадаад харилцааны яаманд ажилласан. Пусан хотод суугаа Консул Ц.Өнөрзаяагийн хувьд бол улстөрийн томилгоо байсан. Өмнө нь Солонгос улсад ажиллаж амьдарч байсан хуулийн чиглэлийн мэргэжилтэй хүн. Орон тооны хүмүүсийн тухай асуудал одоохондоо яригдаагүй байна. Мэдээж мэргэжлийн томилгоо хийнэ.
Тус улсын Ерөнхийлөгчийн веб сайтад аливаа асуудлаар санал, гомдол гаргах юм бол асуулга явуулаад 200 мянган хүний санал хүрсэн тохиолдолд асуудлыг хэлэлцэн, шийдвэрлэдэг. Санал хураах хугацаа 30 хоног. Одоо манайхаас хүргэсэн санал 200 мянга давсан. Хугацаа нь хараахан дуусаагүй байгаа. Тиймээс ирэх нэгдүгээр сард Засгийн газар нь ямар арга хэмжээ авахаа бидэнд мэдэгдэнэ.
Хэргийн хувьд гэвэл хоёр бага насны хүүхдийнх нь хэрэг хаагдсан. 14, 15 настай хоёр хүүхдийн хэрэг үргэлжилж байгаа. Орон нутгийн цагдаагийн байгууллагаас нь хорьж цагдсан, мэдээллийг олон нийтэд тараасан зэрэг гурван үндэслэлээр хэрэг үүсгэн, нэмэлтээр шалгаж байгаа” гэлээ.
