Үндэсний их баяр наадамд дөрөв давсан бөхчүүдийг допингийн шинжилгээнд хамруулдаг. Энэ жилийн наадамд 512 бөх барилдсанаас 32 нь допингийн шинжилгээнд хамрагсан бөгөөд нэг бөхөөс сэргээшийн төрлийн бодис илэрсэн байна.
Энэ талаар Хууль Зүй, Дотоод Хэргийн Яамны Төрийн нарийн бичгийн дарга П.Сайнзориг “Допинг илэрсэн бөхийн нэрийг одоогоор зарлах боломжгүй.
Эхлээд энэ бөхдөө мэдэгдэх бөгөөд тухайн хүн өөрийн эрхийн дагуу Б сорьцын шинжилгээнд орох эсэхээ шийднэ. Үүний дараа бөхийн нэр тодорхой болно. Б сорьцын шинжилгээний хариунаас хамаарч тухайн бөхөд арга хэмжээ авах эсэх зэрэг дараагийн асуудлууд яригдана.
Эргэлзээтэй хариуг дахин дахин нягталдаг гэж ойлгож байгаа. Ингээд сүүлийн хариу өнөөдөр буюу наймдугаар сарын 21-нд ирсэн тул энэ даруйд олон нийтэд мэдээлж байна. Тухайн бөхөөс бүх цаг үед хориглосон бодис илэрсэн. Тэрбээр Б сорьцын шинжилгээ хийлгэх бол өөрөө зардлаа гаргана” хэмээв.
Мөн тэрбээр допинг илэрсэн бөхийг тодорхой хэлэхийг хүссэн сэтгүүлчдийн асуултад “Шөвгөрсөн бөхөөс допинг илэрсэн. Үүнээс цааш мэдээлэл өгөх боломжгүй. Допинг хэрэглээд ийм үр дүнд хүрсэн нь харамсалтай байна” гэлээ.
