“Энэ сарын хүүхдийн мөнгөн тэтгэмж болох 100,000 төгрөгийг өнөөдөр /дөрөвдүгээр сарын 21-ний/ өглөөнөөс иргэдийн данс руу шилжүүлнэ” хэмээн Хөдөлмөр, Халамж Үйлчилгээний Ерөнхий газраас мэдээллээ. Өрхөд шинээр хүүхэд мэндэлсэн бол харьяа баг, хорооны Засаг даргад хандаж, өрхийн бүртгэлд бүртгүүлэн E-Mongolia, E-halamj системээр “Шинэ төрсөн хүүхдэд хүүхдийн мөнгө авах хүсэлт”-ийг илгээх журамтайг санууллаа.
Эргэн сануулахад, ЗГХЭГ-ын дарга Д.Амарбаясгалан “Хүүхдийн мөнгийг танаж, нийт хүүхдийн 91 хувьд олгох нь ард иргэдийн амьдралд нийцэхгүй байна гэсэн санал гомдол их ирсэн. Өрхийн нэгдсэн бүртгэлийн сангийн мэдээлэл зөрүүтэй байдгаас хамаараад орлогын түвшин нь тодорхой хязгаарлалтад өртөж, айл өрхүүд хасагдсан байна гэсэн гомдол их байна.
Хүүхдийн мөнгөтэй холбоотой асуудлаар ҮХЦ-д нэр бүхий иргэд хандсан байгаа. Засгийн газар Үндсэн хуулийн шийдвэрийг харж байна. Өмнөх жилүүдэд хүүхдийн мөнгийг хүүхэд бүрт олгодог байсан бол хуульд нэмэлт өөрчлөлт оруулан халамжийн нэг төрөл гэсэн өөрчлөлтийн дагуу тодорхой зорилтот бүлгүүдэд олгож эхэлсэн.
Ковидын үед хүүхдийн мөнгөөр дамжуулан өрхийн эдийн засгийг дэмжих чиглэл барьж ажиллаж байсан. Одоо бол эдийн засгийн сэргэлт эхэлж буй цаг үе тул халамжийн бодлогыг багасгах, илүү үр дүнтэй үйл ажиллагаанд хөрөнгө мөнгөө зарцуулах ёстой гэж Сангийн яам байр сууриа илэрхийлсэн байгаа” гэсэн юм.