А аминдэм дутагдахад өсөлт хөгжил, ясжих үйл явц саатах ба харанхуйд харахгүй болох, үдшийн харалган, нүд хуурайшилт, кератомаляци, цаашлаад хараагүй болох ч эрсдэл үүсдэг хэмээн НЭМҮТ-өөс санууллаа. Тиймээс улаан – шар өнгийн хүнсний ногоог элбэг хэрэглэхийг зөвлөжээ.
Түүнчлэн, А аминдэм бол байгалийн гаралтай олон төрлийн хоол хүнсэнд байдаг өөхөнд уусдаг антиоксидант, витамин бөгөөд холын хараа, нөхөн үржихүй, дархлаанд чухал үүрэг гүйцэтгэдэг. Мөн зүрх, бөөр, уушиг гэх мэт амин чухал эрхтнүүдийн үйл ажиллагаанд нөлөөлдөг. А аминдэм нь шувуу, загасны мах, өндөг гэх мэт амьтны гаралтай бүтээгдэхүүн, жимс, хүнсний ногооны гаралтай гэж 2 хуваагддаг.
Энэ нь шинэ эд эсийг бий болоход гол нөлөө үзүүлдэг тул эрүүл арьс, үс ургалтад маш чухал үүрэгтэй. Үс бол биеийн хамгийн хурдан ургадаг эд бөгөөд зарим судалгаагаар А аминдэмийн дутагдал нь үс унахад хүргэдэг болохыг тогтоожээ. Үүгээр зогсохгүй тэжээллэг бодис нь хуйханд тос үйлдвэрлэхэд тусалдаг бөгөөд энэ нь уутанцрийг чийгтэй байлгаж, үс нь бат бэх, эрүүл ургахад нөлөөлдөг байна. Мөн түүнчлэн А аминдэм нь арьсны шинэ эс бий болгох, засахад шаардлагатай байдаг. Судалгаагаар А аминдэм нь экзем гэх мэт арьсны архаг өвчин болон арьсны үрэвсэлтэй тэмцэхэд тусалдаг болохыг харуулж байна.
А аминдэм агуулсан эмийг экземийн хуурай, даргар арьсыг эмчлэх үр дүнтэй эмчилгээ гэдгийг хэд хэдэн судалгаа харуулсан бөгөөд уг эм нь экземийн шинж тэмдгийг 53 хувиар бууруулдаг болохыг тогтоожээ.