ХӨСҮТ-өөс коронавирусийн BQ1.2, BF7 хувилбарын тандалт судалгааны үр дүн, онцлог, олон улсад тархсан байдал, вакцинжуулалтын үр дүн, бусад өвчний талаар мэдээлэл өглөө.
ХӨСҮТ-ийн дэд захирал Ж.Байгалмаа “2022 оны 46-р долоо хоногийн байдлаар Монгол Улсын хэмжээнд 1855 коронавирусийн тохиолдол бүртгэгдсэн.Үүнийг өмнөх долоо нь хоногтой харьцуулахад өссөн үзүүлэлт юм. Мөн нас баралт бүртгэгдсэн.
Омикроны дэд хэв шинж бүртгэгдсэнээс хойш халдвар хэрхэн тархаж байгаа талаар тандалт, судалгаа хийсэн. Ингэхэд тохиолдлуудын 67 хувь нь ажлын газрын хүнээс, 38 хувь нь гэр бүлийн хүнээсээ халдвар авсан гэжээ. Ажлын байран дээрээс халдвар авах тохиолдол их байгаа учраас дэглэмийг сайтар баримлах шаардлагатай. Омикроны шинээр бүртгэгдсэн дэд хэв шинжийн үед хоолой өвдөх, хуурай ханиалгах, хамар битүүрэх, нус гоожих шинж илэрч байна” гэлээ.
Мөн тэрээр үргэлжлүүлэн “Омикроны хувьд нууц үеийн хугацаа нь богино бөгөөд BQ.1.2, BF.7 дэд хувилбарын хувьд нууц үеийн хугацаа нь дунджаар хоёр хоног байна. Батлагдсан тохиолдлууд ихэвчлэн халдвартай хүнтэй харьцсанаас хойш хоёр хоног дотроо шинж тэмдэг илэрч байна гэж хэлж байгаа.
Харин давтан өвдөлтийн хувь буюу дахин халдвар авсан тохиолдол энэ дэд хэв шинж дээр 58 хувьд хүрсэн байна. Тодруулбал, энэ оны эхний хоёр сард омикрон хувилбарын оргил үед давтан халдвар авсан тохиолдол 25 хувь байсан бол одоо омикроны BQ.1.2, BF.7 дэд хувилбарын үед давтан өвдөлтийн хувь хоёр дахин нэмэгдсэн байгаа юм.
Ингэхдээ ихэвчлэн долоон сараас нэг жилийн хугацаанд дахин халдвараар өвчилж байна. Өөрөөр хэлбэл, өмнө нь халдвар аваад эдгэрсний дараа тогтсон байгалийн дархлаа нь долоон сар орчмын дараа буурсан тул ийнхүү давтан өвдөж байна.
Иймд долоон сараас нэг жилийн өмнө коронавируст халдвараар өвдсөн бол одоо давтан өвдөх эрсдэл үүссэн. Тиймээс дархлаа сэргээх вакцин хийлгэх шаардлагатай” гэсэн юм.