ХСҮТ-н толгой хүзүү, нөхөн сэргээх мэс заслын тасгаас Бамбайн зангилааны тухай түгээмэл асуултад хариулсныг хүргэж байна.
1. Бамбайн зангилаа хэр элбэг тохиолддог вэ?
Бамбайн зангилаа нь 60-с дээш насны хүн амын 50%-д тохиолддог бөгөөд эмэгтэйчүүдэд эрчүүдтэй харьцуулахад 4 дахин элбэг байдаг. Эдгээрээс 90%-с илүү хувь нь хоргүй зангилаа байдаг.
2. Бамбайн зангилаатай эсэхээ яаж мэдэх вэ?
Бамбайн хэт авиан оношилгоо(ЭХО) хийлгэх нь тухайн зангилааны хэлбэр, бүтэц, хэмжээ зэрэг оношилгооны чухал ач холбогдолтой мэдээллийг өгдөг.
3. Бамбайн эсийн шинжилгээг заавал хийлгэх ёстой юу?
Хэрвээ бамбайн зангилаа нь нэг сантиметрээс том болон бамбайн хорт хавдруудын гол шинж болох жижиг шохойжилтууд, зах ирмэг тэгш бус, эхо ойлт буурсан зэрэг шинжүүдийг агуулсан бол эсийн шинжилгээ өгөхийг эмч зөвлөнө.
4. Бамбайн хорт хавдрын эрсдэлт хүчин зүйлүүд юу вэ?
Цацраг идэвхт бодисын нөлөө, толгой хүзүүний байрлалтай хавдруудын туяа эмчилгээний дараа, удамшил, нас, эмэгтэй хүйс зэрэг нь нөлөөлнө.
5. Бамбайн хоргүй зангилаатай бол мэс засал эмчилгээ зайлшгүй хэрэгтэй юу?
Бамбайн зангилаа 4см-аас том хэмжээтэй бол мэс засал эмчилгээ сонгож болно.
6. Мэс засал эмчилгээнээс өөр эмчилгээ байдаг уу?
Хоргүй зангилааны үед зарим тохиолдолд радио давтамжит түлэх эмчилгээ буюу RFA эмчилгээ хийлгэж болно.
7. Хэрхэн хянах вэ?
6 сараас 1 жил тутамд бамбайн хэт авиан(ЭХО) шинжилгээ хийлгэж хянана.
