УИХ-ын чуулганы хуралдаанаар ирэх оны улсын төсвийн төслийг хэлэлцэж гишүүд асуулт, хариулт болон санал хэлж байна. Энэ үеэр Ц.Анандбазар гишүүн санал хэлэв.
Тэрээр “Түгжрэлд мөнгө төсөвлөнө гээд байгаа. Түгжрэлийг мөнгөөр бус, шинэлэг санаа, IT технологи, зөв менежментийн бодлогоор буулгах ёстой. Улаанбаатар хотод жил бүр 35-50 мянган оюутан нэмэгдэж байна. Ерөнхий сайд уг нь зөв санаачилга эхлүүлсэн. Өмнөговьд их сургууль байгуулж байна лээ.
Их, дээд сургуулийг бүтнээр нь орон нутаг руу шилжүүлбэл дампуурна. Харин нэгдүгээр курсийн оюутнуудыг хөдөө орон нутаг руу шилжүүлбэл 50,000 оюутан түгжрэл үүсгэдэг байдал байхгүй болно. Хөдөө орон нутагт боловсон хүчин бэлэн байгаа” гэв.
Мөн тэрээр “Үр дүнгүй олон зээл авах гэж буй нь ажиглагдаж байна. Төсвийн төсөөллийн хүрээнд өрийн таазыг нэмэх гэж байгаа бол урсгал зардлаа танах хэрэгтэй. Урсгал зардлаар өр зээл нэмэх боломжгүй. 2024 онд улсаа дампууруулчихсан эдийн засагтай баймааргүй байна” гэдгийг хэлсэн юм.
