Ebarimt сугалааны тохирол энэ сарын 12-нд буюу энэ лхагва гарагт явагдана. Энэ оны есдүгээр сарын 1-30-ны хооронд худалдан авалт хийсэн төлбөрийн баримтаа уншуулж 10-р сарын сугалааны шууд тохиролд идэвхтэй хамрагдаарай.
Зургаан сар завсарласны дараа шинэчлэгдсэн хувилбараар явагдах шууд тохирлыг хэрхэн зохион байгуулах тухай журам батлагдсан. Уг журамд, тохирлыг сугалааны машинаас найман бөмбөлөг санамсаргүй байдлаар тус тус үлээлгэн гаргах замаар хөндлөнгийн хяналтын дор зохион байгуулах юм байна. Сугалааны дугаарын найман цифр нь бөмбөлөг үлээлгэн тодруулсан найман цифртэй дараалал болон утгаараа тохирч байвал 1 дүгээр зэргийн урамшуулал буюу супер шагналыг олгоно.
НӨАТ-ын сугалааны тохиролд:
1-10 баримт бүртгүүлээд 3 орон таарвал 60,000 төгрөг
11-50 баримт бүртгүүлээд 4 орон таарвал 100,000 төгрөг
51-ээс дээш баримт бүртгүүлээд 5 орон таарвал 500,000 төгрөг
1-10 баримт бүртгүүлээд 6 орон таарвал 5,000,000 төгрөг
11-50 баримт бүртгүүлээд 7 орон таарвал 10,000,000 төгрөг
51-ээс дээш баримт бүртгүүлээд 8 орон таарвал 30,000,000 төгрөгийн урамшуулал авна.
Сангийн сайд Б.Жавхлан “Тавдугаар сард сугалааг зогсоосноос хойш сугалаа баталгаажуулдаг тоо хоёр дахин буурсан. Долоон жилийн үр дүн маань дөрөвхөн сарын дотор 50 хувиар буурсан. Энэ нь цаашлаад НӨАТ-ын орлогод сөргөөр нөлөөлөх асуудал үүснэ. Одоо бид сугалааны системд шинэчлэл хийсэн. НӨАТ-ын баримтаа баталгаажуулж уншуулсан иргэн бүр өөрийн сугалааны сериал дугаарыг утаснаасаа харах боломжтой болсон.
Мөн одоо уншуулсан баримт болгон сугалааны тохиролд оролцоно. Олон баримт уншуулах тусам хожих магадлал өндөрсөнө. Уншуулсан баримтын хэмжээгээр сар болгоны сугалаанд өгөх хожилын сан нэмэгдэнэ” гэсэн юм.
