Төрийн ордонд болсон “Халамжаас хөдөлмөрт” хэлэлцүүлгийн үеэр ХНХ-ын сайд асан Д.Сарангэрэл “Манай яамныхан бол улны айлууд гэж нэрлэдэг юм байна. Өөрөөр хэлбэл, үнэхээр ядуу байгаа айл өрх.
Ядуу гэдэг үг хэрэглэхээ больж, эмзэг бүлэг, зорилтот бүлэг гэж байгаа юм. Гэхдээ миний найз эмзэг бүлгийн хүн гэлтэй нь бишдээ, ядуу гэдгээрээ явах нь зөв гэж би бодоод байгаа юм” хэмээн хэлсэн нь олон нийтийн эгдүүцлийг хүргэж, улмаар түүнийг үүрэгт ажлаас нь огцруулахаар шийдвэрлэсэн.
Тэгвэл дараагийн Хөдөлмөр, нийгмийн хамгааллын сайд томилогдох хүртэл ЗГХЭГ-ын даргын хувиар сайдын ажлыг Д.Амарбаясгалан хариуцан ажиллахаар болжээ.
Энэ тухай Д.Амарбаясгалан цаг үеийн асуудлаар мэдээлэл хийх үеэрээ мэдэгдсэн юм. Тэрээр “Дараагийн сайд томилогдох хүртэл ЗГХЭГ-ын даргын хувиар миний бие Хөдөлмөр, нийгмийн хамгааллын сайдын ажлыг хариуцан ажиллана.
Аливаа төрийн албан тушаалтнууд хүний эрхийн асуудалд ул суурьтай хандаж, хүмүүнлэг иргэний нийгмийг цогцлоох үйлдэл анхаарал, хариуцлагатай хандаж байхыг энэхүү үйлдэл тодорхой харуулж байна.
Д.Сарангэрэлийн хувьд хүний эрхийн зөрчилтэй, ёс зүйн асуудал гаргаснаас гүнээ ухамсарлаж, чөлөөлөгдөх хүсэлтээ гаргасан гэдгийг албан ёсоор хэлье” гэсэн юм.
