“Монголын сэтгэцийн эрүүл мэндийн өнөөгийн байдал” үндэсний чуулган есдүгээр сарын 13-нд болно. Энэ өдөр Монгол Улс дахь сэтгэцийн эрүүл мэндийн өнөөгийн нөхцөл байдал, цаашид анхаарах асуудлуудыг эрдэмтэн, судлаачид хэлэлцэж үндэсний хэмжээнд чуулах ажээ.
Манай улсын хүн амын сэтгэцийн эрүүл мэндийн байдлын талаар мэргэжилтнүүд дараах мэдээллийг өгснийг сийрүүлэн хүргэж байна.
АШУҮИС, Анагаах Ухааны Сургуулийн Сэтгэцийн эрүүл мэндийн тэнхимийн эрхлэгч, АУ-ы доктор, профессор З.Хишигсүрэн: ДЭМБ-ын тооцооллоор жилд 800- 1,000,000 хүн ам иа хорлодог. Үүнийг 1-2 дахин нэмэхүйц байдлаар амиа хорлох оролдлогыг хийдэг гэсэн тоо баримт байдаг. Харин манай улсын хувьд ид ажил хөдөлмөр эрхлэх насны залуучууд болон хүүхэд, өсвөр үеийнхний дунд амиа хорлох, амиа хорлох оролдлого хийх нь нэмэгдэж байгаа.
Сэтгэцийн Эрүүл Мэндийн Үндэсний Төв(СЭМҮТ)-ийн ерөнхий захирлын үүргийг хавсран гүйцэтгэгч, АУ-ы доктор В.Баярмаа: Хүүхдийн эмгэгийн талаар 11 аймаг, таван дүүрэгт сургуулиуд дээр суурилан явуулсан судалгааны дүнд
- 60.5 хувь нь эрүүл
- 30.5 хувь нь тулгамдсан асуудалтай
- 9 хувь нь сэтгэл хөдлөл, зан үйлийн эмгэгтэй гарсан.
Монголын Сэтгэцийн Эрүүл Мэндийн Нийгэмлэгийн Удирдах зөвлөлийн гишүүн Р.Энхтүвшин: Донтолтын эмгэг их байна. Жишээ нь мөрийтэй тоглох, архины хамаарал их байдаг. Сүүлийн үед залуучуудын дунд мансууруулах бодисын хараат байдалд орох гэх мэт донтолтын эмгэгүүд их байгаа юм. Мөн дэлгэцийн хараат байдал, тэр дундаа фэйсбүүк, инстаграм, твиттерийн зэрэг донтолтын эмгэг элбэг байна гэж үзэж байгаа.
Клиникийн профессор, сэтгэл засалч эмч Д.Эрдэнэбаатар: Монголд сэтгэцийн эмгэг судлаач 150 гаруй эмч бий. Өнөөдөр гурван сая хэдийнээ давсан Монголын хүн амд энэ нь хаана ч хүрдэггүй. Сэтгэл засал хэмээх том салбар хөгжиж эхэлж байна. Энэ тал дээр боловсон хүчний асуудал чухал. Дээрээс нь эдийн засаг, материаллаг баазын хангамжийг сайжруулах зайлшгүй шаардлагатай гэж боддог.
Эх сурвалж: Монголын Сэтгэцийн Эрүүл Мэндийн Нийгэмлэг
