Нийгмийн даатгалын ерөнхий газрын Нийгмийн даатгалын улсын ахлах байцаагч Л.Ариунтулга тэтгэмжийн даатгалын талаар мэдээлэл өгснийг сийрүүлэн хүргэж байна.
Даатгуулагч тэтгэмжийн даатгалд хэдэн хувийн шимтгэл төлдөг вэ?
– Нийгмийн даатгалын тухай хуулийн 15-р зүйлд заасны дагуу хөдөлмөрийн хөлс түүнтэй адилтгах орлогоос ажил олгогч нэг хувь, албан журмын даатгуулагч 0.8 хувь, сайн дурын даатгуулагч нэг хувиар шимтгэл төлдөг.
Даатгуулагч тэтгэмжийн даатгалын сангаас ямар тэтгэмж авах эрхтэй вэ?
– Нийгмийн даатгалын сангаас олгох тэтгэвэр тэтгэмжийн тухай хуулийн 17-р зүйлд заасны дагуу хөдөлмөрийн чадвараа түр алдсаны тэтгэмж авах эрхтэй.
Мөн жирэмсний болоод амаржсаны тэтгэмж, оршуулгын тэтгэмж авах эрхтэй байдаг.
– Даатгуулагч тэтгэмжийн даатгалын сангаас жирэмсний болоод амаржсаны тэтгэмж авах эртэй гэлээ. Энэ талаар мэдээлэл өгнө үү?
– Нийгмийн даатгалын сангаас олгох тэтгэвэр, тэтгэмжийн тухай хуулийн 19.1-т жирэмсний болон амаржсаны тэтгэмжийн эрхийн талаар тусгаж өгсөн байдаг.
Тэтгэмжийн даатгалын шимтгэлийг жирэмсний чөлөө авахаас өмнө 12 сараас доошгүй хугацаанд, үүнээс сүүлийн 6 сард нь тасралтгүй төлсөн байх, 196 доошгүй хоног тээгээд буюу дутуу төрүүлсэн даатгуулагч, 196 хоног тээгээгүй боловч амьдрах чадвартай хүүхэд төрүүлсэн бол эх жирэмсний болон амаржсаны тэтгэмж авах эрхтэй.
Мөн албан журмын даатгуулагч хүүхдээ асарч чөлөөтэй байх хугацаандаа дахин хүүхэд төрүүлбэл тэр бүрд нь жирэмсний болон амаржсаны тэтгэмж олгоно гэж хуульд заасан байдаг.
Жирэмсний болон амаржсаны тэтгэмж авах даатгуулагчийн сүүлийн 12 сарын дундаж цалин хөлснөөс 100 хувиар бодож, 4 сарын хугацааны ажлын өдрөөр тооцож олгоно.
