Гэр бүл хүүхэд залуучуудын хөгжлийн газрын Хүүхдийн эрхийн хэрэгжилтийн газрын дарга Г.Саранхүү хүүхдийн осол гэмтэл, хурдан морь унаач хүүхдийн аюулгүй байдлын талаар дараах мэдээллийг өглөө.
Тэрбээр “2019-2021 онуудад цар тахлын нөхцөл байдалтай холбоотой улсын хэмжээнд хурдан морины уралдаан зохион байгуулагдаагүй. Харин энэ онд баяр наадам өргөн дэлгэр болох тов гарсан байна. Гэр бүл хүүхэд залуучуудын хөгжлийн газраас хурдан морь унаач хүхдийн эрхийг хамгаалах хүрээнд хэд хэдэн ажил хийгээд явж байна.
Нэгдүгээрт, хүүхдийн аюулгүй байдлыг хангах үүднээс унаач хүүхэд болон эцэг эхчүүдэд, уяачид зориулсан зөвлөмжийг хүргүүлж байна. Мөн унаач хүүхдүүдийн урьдчилсан бүртгэлийг хийж, гэнэтийн ослын даатгалд даатгуулсан эсэх, морь унах хуулийн насанд хүрсэн эсэх, морь унаж бэлтгэгдсэн эсэхийг бүртгэн авч байна.
Улмаар гарааны зурхай дээр унаач хүүхдүүдийг өмнөх мэдээлэл бүхий картаар таньж, стандартын хувцас хэрэгслийг зөв өмссөн эсэхэд хяналт тавьж ажиллаж байна.
Энэ он гарснаас хойш хурдан морины 82 уралдаан зохион байгуулагдсан мэдээлэл бий. Эдгээр уралдаанд нийт 3184 унаач оролцож, уралдааны явцад 9 хүүхэд бэртэж гэмтэж, нэг нь нас барсан байна.
Хоёрдугаарт, Үндэсний их баяр наадмын тухай хуулиар долоогоос дээш насны хүүхэд хурдан морь унаж уралдахыг зөвшөөрдөг байсан. Харин тун саяхан энэ хуулийг шинэчлэн найруулж баталснаас хурдан морь унаж уралдах хүүхдийн насыг найм болгон нэмсэн.