Таталтын эсрэг эм хоёр жил гаруй хугацаанд тасарсанд бухимдсан эцэг, эхчүүд Төрийн ордны гадна өчигдөр жагссан. Энэ үеэр Хөдөлмөр, нийгмийн хамгааллын сайд А.Ариунзаяа Хүүхдийн төлөө фондын мөнгийг өвчтэй хүүхдүүдийн эмчилгээнд зарцуулах боломжтой эсэх талаар дараах мэдээллийг өглөө.
Тэрбээр “Хүүхдийн төлөө фондыг зөвхөн хүүхдэд зориулсан бүтээн байгуулалтад зарцуулах ёстой. Бид эмнэлэг барьж болно. Аль болох л олон хүүхдэд хүрэх ажлыг хийх ёстой.
Мэдээж өвдөөд хандив цуглуулж байгаа хүүхэд олон байна. Гэхдээ түүнээс олон хүүхдийг хамруулахын тулд бид илүү сайн бодлого явуулах ёстой. Хүүхдийн төлөө фондоор эмнэлэг барих нь чухал болохоос биш хандивт өгнө гэвэл арав орчим хүүхдэд л зарцуулагдах мөнгө болчихно. Тиймээс аль болох бүтээн байгуулалт тал руугаа анхаарч, эрүүл мэндийн үйлчилгээг сайжруулах хэрэгтэй” гэв.
Мөн тэрбээр “Таталтын эмийг албан ёсоор оруулж ирэх зөвшөөрлийг нь өгч байгаа. Нөгөө талаар энэ эмийг эрүүл мэндийн даатгалын сангаас хөнгөлдөг, төрөөс даадаг байх тогтолцоог бий болгоё гэж Эрүүл мэндийн сайдтай ярьсан.
Мөн хөгжлийн бэрхшээлтэй хүүхдийн хөгжлийн төв өнөөдөр очиж ажиллахад тус төв эрүүл мэндийн үйлчилгээ бус сэргээн засах, хөгжлийн үйлчилгээ л үзүүлдэг байсан. Тиймд тэнд эрүүл мэндийн үйлчилгээг сайжруулж, тусгай зөвшөөрөл авах ажил хийгдэж байна, тун удахгүй үр дүн гарна.
Өнөөдөр өвчний улмаас хандив цуглуулаад гадагшаа явж байгаа маш олон хүүхэд бий. Гэтэл цөөн хүүхдүүдийг гадагшаа явуулахаас илүү яг мэргэжлийн эмч нарыг гаднаас урьж, Монголд ажиллуулах нь илүү олон хүүхдэд хүрэх боломж нь нээгдэнэ. Иймд Эрүүл мэндийн яам болон ГХЯ хамтран мэдрэлийн өнцгүүдийг суллах хагалгааг судалж, бүрэн эдгэхгүй ч тодорхой хэмжээний сайжруулалт байгаа бол бид аль болох үр дүнтэй сайжруулах тал дээр ажиллах ёстой.
Нөгөө талаар бас дотоодод ажиллаж байгаа эмч нарынхаа чадамжийг нэмэгдүүлж, дотооддоо энэ хагалгааг хийдэг болохын тулд боловсон хүчнээ бэлдэж эхэлье гэж бодож байна. Гэхдээ үүнд цаг хугацаа орно” гэсэн юм.